Byggð verða 32 ný hjúkrunarrými við DAB í Borgarnesi.

Ríkið hefur tryggt fjármögnun vegna uppbyggingar um 360 hjúkrunarrýma í níu sveitarfélögum, þar á meðal byggingu 32 hjúkrunarrýma við Dvalarheimili aldraðra í Borgarnesi, og eru samningar við sveitarfélögin á lokastigi. Í tilkynningu frá félags- og tryggingamálaráðuneytinu í gær segir að þar sem undirbúningur verkefna er lengst kominn geti framkvæmdir hafist á næstu mánuðum, en annarsstaðar á seinni hluta þessa árs eða á næsta ári. Gert er ráð fyrir að undirbúningur vegna framkvæmda í Borgarnesi sé kominn hvað lengst en á næstu dögum verður samkvæmt heimildum Skessuhorns gengið frá samningi um að DAB hafi umsjón með verkinu fyrir hönd Borgarbyggðar sem síðan gerir samninginn við ríkið.