14. júní. 2010 03:38
„Þessi úrslit sýna að það geta allir unnið alla í riðlinum og mér sýnist að mitt lið hafi verið með þessu að stimpla sig inn í baráttuna. Við getum alveg eins og hin liðin í riðlinum blandað okkur í toppbaráttuna, orðið annað tveggja liða sem fer í úrslitakeppnina í haust,“ segir Garðar Jónsson þjálfari 3. deildarliðs Skallagríms, sem gerði sér lítið fyrir og lagði topplið Tindastóls í riðlinum, 3:2, í leik sem fram fór á Skallagrímsvelli sl. laugardag. Guðmundur Lúther Hallgrímsson kom Skallagrími yfir snemma leiks. Hann var svo rétt á eftir nálægt því að bæta við öðru marki þegar hann komst einn í gegn og skaut í innanverða stöngina og út, líkt og miðherji Gana gerði um svipað leyti í leiknum móti Serbíu á HM. Tindastólsmenn jöfnuðu skömmu síðar, en það var svo Marteinn Vigfússon sem kom Skallagrími í 2:1 áður en flautað var til leikhlés.
Skallagrímsmenn voru mun betra liðið í fyrri hálfleiknum og Guðmundur Lúther var aftur á ferðinni um miðbik seinni hálfleiks þegar hann bætti stöðuna enn fyrir Skallagrím með marki, 3:1. Tindastólsmenn náðu svo að skora, 2:3, þegar um 10 mínútur voru til leiksloka og sóttu nokkuð stíft undir lokin. Eyþór Óli Frímannsson var þá betri en enginn í marki Skallagríms, en hann varði nokkrum sinnum vel í leiknum, þar af í tvígang á meistaralegan hátt.