Hvalfjörðurinn skartaði sínu fegursta þegar blaðamaður Skessuhorns kíkti í heimsókn í Hvalstöðina við Þyril fyrir skömmu. Það var líka að sjá heilmikið líf á svæðinu við Hvalstöðina þótt ekki væru menn að flensa hval þennan daginn, törnin sem staðið hafði dægrin á undan var afstaðin og bæði hvalveiðiskipin, Hvalur 8 og Hvalur 9, komin á veiðar. Á tveggja klukkutíma fresti berast skeyti af miðunum hvernig takist að fanga hvalinn og eftir þeim skeytum bíður landfólkið eftir með spenningi. „Þetta gengur allt saman mjög ljúft. Veiðarnar ganga vel, nú er hvalurinn kominn það nálægt landinu að ekki eru nema um 150 mílur á miðin. Vinnslan gengur núna eins og smurð vél. Þegar við vorum að byrja aftur í fyrra af alvöru eftir 20 ára hlé, þurftum við að ráða marga óvana og þeir sem reynsluna höfðu voru aðeins farnir að ryðga. Það gerist nú á styttri tíma en 20 árum.