Keppt verður í tíu greinum á unglingalandsmóti UMFÍ sem fram fer í Borgarnesi um helgina. Þetta eru motocross, golf, glíma, skák, knattspyrna, körfubolti, frjálsar íþróttir, sund, hestaíþróttir og dans. Aldrei áður hefur verið keppt í dansi en í Borgarfirði er mikill áhugi fyrir dansíþróttinni og þess vegna var honum bætt við. Önnur nýlunda að þessu sinni er fyrirkomulag verðlaunaafhendingarinnar. Verðlaunapalli verður komið fyrir á milli íþróttaleikvangsins og sundlaugar og þar verða verðlaunaafhendingar á fyrirfram ákveðnum tímum. „Ég tel að þetta verði með betri sniði en áður. Verðlaunaafhendingin hefur áður verið á miðjum velli og frjálsíþróttirnar og sundið tekur mun lengi tíma en aðrar greinar. Þá hefur oft verið erfitt fyrir afa og ömmur að taka myndir úr stúkunni,“ segir Margrét Baldursdóttir verkefnisstjóri landsmótsins í samtali við Skessuhorn.