06. ágúst. 2010 09:40
Niðurstöður úr könnun sem lögð var fyrir nemendur í 8., 9., og 10. bekk grunnskólanna á Akranesi í vor varðandi hagi og líðan ungmenna voru einkar ánægjulegar, að sögn Heiðrúnar Janusardóttur verkefnisstjóra æskulýðs- og forvarnarmála á Akranesi. Telur hún ástæðu til að óska unga fólkinu á Akranesi og foreldrum þeirra til hamingju en samkvæmt niðurstöðunum hefur vímuefnaneysla ungmanna minnkað talsvert á undanförnum árum. Ungmennin voru meðal annars spurð að því hvort þau hefðu orðið drukkin á síðastliðnum 30 dögum, hvort þau reyktu daglega og hvort þau hafi prófað hass. Á Akranesi hafa daglegar reykingar 10. bekkinga minnkað niður í 8% frá 14% árið 2008. Þá sögðust 5% tíundu bekkinga hafa orðið drukkin á síðastliðnum 30 dögum miðað við 18% árið 2008. 5% nemenda sögðust hafa prófað hass en þess má geta að 22% tíundu bekkinga á Akranesi sögðust hafa prófað hass árið 2000.
Á landsvísu sögðust 16% ungmenna hafa orðið drukkin síðastliðna 30 daga í ár sem er talsverð lækkun frá því þegar mest var árið 1998. Þá sögðust 42% hafa orðið drukkin í mánuðinum. Í fyrra sögðust 19% ungmenna í 8.-10. bekk á Íslandi hafa orðið drukkin á síðastliðnum 30 dögum svo það er þónokkur lækkun milli ára. Hlutfall þeirra sem reykja daglega hefur einnig minnkað. Í ár segjast 7% ungmenna reykja daglega miðað við 10% í fyrra. Flestir unglingar reyktu daglega árið 1998 eða 23%. Í ár sögðust 6% ungmenna hafa prófað hass en það er mikil fækkun frá 17% árið 1998.