Víkingur Ólafsvík voru langt frá sínum besta leik þegar þeir mættu Aftureldingu í Mosfellsbæ í gærkvöldi. Leikurinn endaði með 1-1 jafntefli en þess má geta að fyrri viðureign liðanna í sumar fór 5-0 Víkingum í vil. Fyrsta mark leiksins kom á 22. mínútu eftir hornspyrnu. Þar var á ferðinni fyrirliðinn sjálfur Brynjar Gauti Guðjónsson sem skallaði boltann laglega í markið eftir spyrnu frá nafna sínum Brynjari Kristmundssyni. Leikurinn var heldur bragðdaufur eftir þetta mark og lítið um hættuleg færi. Þegar venjulegur leiktími fyrri hálfleiks var runninn á enda tókst heimamönnum þó að jafna metin og var þar á ferðinni fyrirliði Aftureldingar, Arnór Þrastarson. Seinni hálfleikur var heldur viðburðalaus en Víkingar voru þó líklegri til að bæta við marki og áttu fleiri skot. Þeir voru þó mjög heppnir að fá ekki mark á sig undir lok leiks þegar sóknarmaður Aftureldingar átti stórhættulegan skalla sem fór rétt framhjá markinu. Lokatölur því 1-1 og bæði lið einu stigi ríkari.