24. ágúst. 2010 08:01
Árni Páll Árnason, félags- og tryggingamálaráðherra, hefur lýst vilja sínum til að leggja fram frumvarp um að tíminn sem fólk á rétt til atvinnuleysisbóta verði lengdur tímabundið úr þremur árum í fimm. Þetta kom fram á samráðsfundi hans með aðilum vinnumarkaðarins sem haldinn var fyrr í sumar. Á fundinum sagði ráðherra að endurskoða þyrfti lög um atvinnuleysistryggingar í heild og lagði til að sú vinna yrði hafin í samráði við aðila vinnumarkaðarins í lok ágúst. Í samræmi við þetta voru sérfræðingar aðilanna á fundi í ráðuneytinu í gær.
Í fjölmiðlum í gær var haft eftir Halldóri Halldórssyni, formanni Sambands íslenskra sveitarfélaga, að þúsundir manns gætu þurft að leita til félagsþjónustu sveitarfélaganna verði réttur til atvinnuleysisbóta ekki lengdur í fimm ár. Jafnframt var haft eftir honum að félags- og tryggingamálaráðherra hefði ekki svarað því af eða á hvort bótarétturinn verði lengdur.
Árni Páll vill af þessu tilefni árétta orð sín á samráðsfundinum með aðilum vinnumarkaðarins 16. júní sl: „Eins og ég sagði þá er ég reiðubúinn að beita mér fyrir því að tíminn sem fólk á rétt til atvinnuleysisbóta verði lengdur tímabundið úr þremur árum í fimm meðan við erum að fást við kúfinn í atvinnuleysinu. Við teljum hins vegar mikilvægt að þetta mál sé unnið í fullu samráði við aðila vinnumarkaðarins þannig að nákvæmlega verði farið yfir hvaða áhrif slík breyting kann að hafa. Endurskoðun laganna er nú hafin og þess má geta að fulltrúi Sambands íslenskra sveitarfélaga á aðild að þeirri vinnu.“