25. ágúst. 2010 07:01
Fulltrúar Grundaskóla á Akranesi og Umferðarstofu ásamt samgöngu- og sveitarstjórnarráðherra skrifuðu í dag undir áframhaldandi samning um umferðarfræðslu í skólum. Skólinn hefur verið móðurskóli umferðarfræðslu í grunnskólum landsins frá 2005. Samningurinn er rammasamningur um umferðarfræðslu í grunnskólum landsins og verður Grundaskóli áfram móðurskóli í því verkefni og öðrum grunnskólum til fyrirmyndar og ráðgjafar og fær skv. samningnum greitt eitt stöðugildi fyrir það.
Markmiðið með samningnum er að efla umferðarfræðslu í skólum og stuðla að fækkun umferðarslysa með markvissri fræðslu. Verkefnisstjóri í Grundaskóla sinnir umferðarfræðslu sérstaklega og svarar erindum frá öðrum skólum og skipuleggur námskeið og fræðslufundi fyrir kennara. Þá munu samningsaðilar fylgja eftir umferðarvefnum www.umferd.is í samvinnu við Námsgagnastofnun og kynna vefinn fyrir öðrum skólum. Ráðherra sagði að þrátt fyrir að draga þyrfti úr útgjöldum ríkisins á mörgum sviðum þá væri sumt sem ekki mætti skerða og fjárveiting til þessa verkefnis væri þar á meðal.