Sunnudagana 5. og 12. desember klukkan 12:00 býður Landnámssetrið í Borgarnesi upp á uppáhaldsmat jólasveinanna á hlaðborði. Þetta er að sjálfssögðu þjóðlegur íslenskur matur; bjúgu með rauðkáli, grænum baunum og uppstúf (ekki Stúf), plokkfisk, steikt slátur með rófustöppu og kjötbollur með brúnni sósu og sultu. Í eftirrétt er svo skyr, grjónagrautur með möndlu og ROYAL súkkulaðibúðingur. Einhvern tímann á meðan á borðhaldi stendur má svo eiga von á glorhungruðum jólasveinum – beint ofan af Hafnarfjalli. Þeir reyna að krækja sér í bita og beita til þess ýmsum brögðum. En róast svo þegar þeir hafa fengið nægju sína og dansa með krökkunum í kringum jólatréð.