Í síðustu viku sagði Skessuhorn frá afar athyglisverðri tilraun bóndans Arnórs Kristjánssonar á Eiði í Kolgrafarfirði. Þannig hagaði til að tjaldshjón höfðu til nokkurra ára átt búsetu á malareyri sunnan við bæinn og um sjötíu metra frá sjónum og í þriðja eða fjórða skiptið verpti tjaldurinn á sama stað. Undanfarin vor hefur hreiðrið hins vegar ýmist farið á kaf á háflóði eða tófan stútað eggjunum í því og uppeldi tjaldshjónanna því misfarist. Arnór greip því til þess ráðs að setja frauðplastsplötu við hreiðurstæðið, hálfgerða flotbryggju, sem fest var með bandi við jarðfastan tein og færði hreiðrið í skál sem hann gerði í plötuna. Þessum tilfæringum tók tjaldurinn afar vel og lagðist á eggin sín fjögur eins og ekkert hefði í skorist. Síðastliðinn miðvikudag var háflóð í Kolgrafarfirði og fylgdist ljósmyndari Skessuhorns með því hvernig hreiðrinu reiddi af. Flóðbryggja tjaldsins stóð af sér strauminn og var á floti í tvo daga. Strax á fimmtudeginum, í fjöru, klöktust ungarnir síðan úr eggjunum og héldu á brott eftir að þeir voru orðnir þurrir. Það má því segja að tilraun Arnórs bónda hafi heppnast.