Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
23. október. 2011 12:38

Skallagrímur lagði Þór Akureyri í fyrsta heimaleiknum

Í fyrsta heimaleik vetrarins í Íslandsmóti karla í 1. deild, sigruðu Skallagrímsmenn lið Þórs Akureyri nokkuð sannfærandi, 95-72. Borgnesingar hafa því fullt hús stiga; sex stig og tróna þar með á toppi 1. deildar. Óhætt er að segja að Akureyringar hafi mætt einbeittir og ferskir til leiks, því þeir leiddu leika nær allan fyrsta leikhluta. Réði þar mestu værukær varnarleikur Skallagrímsmanna, en einnig, Akureyringum til hróss, klókur sóknarleikur gestanna. Um miðbik leikhlutans náði Pálmi þjálfari að gera nauðsynlegar ráðstafanir í varnarleiknum með innkomu Sigmars Egilssonar, Óðins Guðmundssonar og Harðar Hreiðarssonar. Þannig var tónninn gefinn varnarlega af ákveðni sem olli straumhvörfum í framvindu leiksins. Uppfrá því náðu Skallagrímsmenn að saxa skammvinnt tíu stiga forskot gestanna niður í eitt stig, 23-24, áður en fyrsti leikhlutinn var allur.

 

 

 

 

Nú gengu Skallagrímsmenn fullir kappi og atorku til annars leikhluta og hófu stórsókn á öllum vígstöðvum vallarins. Sambland af pressuvörn og auknum hraða í framkvæmd leikkerfa sóknarmegin gerði það að verkum að “varnarstopp” Skallagrímsmanna jukust og þannig, í réttu hlutfalli, hrönnuðust körfuboltastigin hjá Sköllum. Jókst kapp heimamanna allverulega við þetta. Staðan í hálfleik var 47-37 fyrir Skallagrími.

 

Um seinni hálfleikinn er það að segja að Borgnesingar fylgdu þeirri varnar- og sóknarstefnu sem mörkuð hafði verið um miðjan fyrri hálfleik af svo miklum þunga að lánlausir og þreyttir Þórsarar fengu ekki rönd við reist. Má segja að úrslitin hafi ráðist að loknum þriðja leikhluta, en þá var staðan 80-50 Skallagrímsmönnum í vil. Pálmi þjálfari hvíldi lykilmenn nánast að fullu í lokaleikhlutanum og leyfði liðsbreidd Borgnesinga að njóta sín til fulls. Lokatölur urðu loks 95-72. Mikilvægum stigum var því landað í höfn heimamanna á þessum fagra laugardegi við Borgarvog.

 

Allir leikmenn Skallagríms fengu að láta ljós sitt skína gegn Þórsurum. Fengu hinir reynsluminni í liði Skallagríms verðmætan tíma til að spila og gat Pálmi þjálfari hvílt lykilmenn á meðan. Aðsópsmestur í liði Skallagrímsmann var - á innan við 20 mínútum - Bandaríkjamaðurinn Lloyd Harrison sem skoraði 22 stig auk þess að taka 6 fráköst, gefa 5 stoðsendingar og stela heilum 8 boltum. Fengur er því af Harrison þessum fyrir Borgnesinga. Pálmi þjálfari var ánægður með leik lærisveina sinna gegn Þórsurum og mat það svo að allir hafi lagt sig vel fram. Aðspurður um hvaða ályktanir megi draga af leik dagsins, svaraði Pálmi því til að meginmarkmiðið verði sett á að fá liðið til að leika vörn í fullar 40 mínútur. Ekki dugi að slaka á í vörninni, heldur halda sama takti allan leikinn. Varnarleikurinn er því aðalverkefnið á næstunni. Að lokum bætti Pálmi því við að liðið eigi “mikið inni”. Því verður fróðlegt að fylgjast með hvernig leik Borgnesinga mun vinda fram á leiktíðinni sem nú er genginn í hönd.

 

Harrison setti flest stig Borgnesinga eða 22, Holmes skoraði 15, Hörður 13, Birgir 12, Davíð 11, Hilmar 7, Sigurður 6, Andrés 3, Sigmar 2 og Davíð 1.

 

Skallagrímsmenn hafa því unnið alla þrjá leiki sína í Íslandsmótinu. Framundan er svo eldskírn er liðið mætir Íslandsmeisturunum sjálfum í KR í fyrstu umferð Lengjubikarsins næst komandi mánudag, 24 október kl. 19:15 í Borgarnesi. Búist er við fjölmenni að sunnan og því ekki úr vegi fyrir heimamenn að mæta í stúkuna og styðja við bakið á Skallagrímsmönnum.

hlh/ Ljósm. sl.

Sjónvarp Skessuhorns
Leit á vefnum
Fréttasafn
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is