Óskar Guðmundsson rithöfundur og fyrrum blaðamaður og ritstjóri byrjaði að einhverjum mæli að venja komu sína í Reykholt um aldamótin. Fyrst í stað fékk hann afnot af fræðimannsíbúð í Snorrastofu og líkaði strax vel við staðinn; náttúruna og fámennið sem einkennir dreifbýlið, kosti þess umfram hið iðandi borgarlíf. Hann fór að leita fyrir sér um húsnæði og festi á endanum kaup á einu af einbýlishúsunum í Reykholti og nefni Vé. Þar býr hann í dag og starfar við skriftir. Stærstu verkefni Óskars síðasta áratuginn voru ritun ævisögu Snorra Sturlusonar sem út kom 2009 og bækurnar um aldirnar. Auk þess hefur hann gripið í ritun fleiri verka og nú í liðinni viku kom út ævisaga Þórhalls Bjarnarsonar biskups og alþingsmanns, brautryðjandans á fjölmörgum sviðum sem ungur að árum batt tryggð við uppsveitafólk í Borgarfirði eftir að hafa starfað þar um tíma sem prestur.

Ítarlega er rætt við Óskar Guðmundsson rithöfund í Véum í Skessuhorni vikunnar sem kom út í dag.