07. júní. 2012 06:45
Fiskmarkaður Íslands fékk IFS ráðgjöf til þess að vinna skýrslu um hugsanleg áhrif fyrirliggjandi frumvarpa um stjórn fiskveiða og auðlindagjalds á starfsemi fiskmarkaða á íslandi, ásamt almennum áhrifum. Páll Ingólfsson framkvæmdastjóri Fiskmarkaðar Íslands segir niðurstöður skýrslunnar uggvænlegar fyrir starfsemi íslenskra fiskmarkaða og segir að áhrifin virðast vera hvað mest og neikvæðust á þann útgerðarflokk sem hefur brauðfætt íslenska fiskmarkaði til þessa, það er lítil útgerðarfélög sem ekki hafa vinnslu samhliða veiðum.
Inn í auðlindarentuna samkvæmt frumvarpinu um veiðigjöld reiknast virðisauki sem verður til í fiskvinnslu. Útgerðarfélög sem eingöngu veiða fisk munu því taka á sig álögur sem tengjast ekki þeirra rekstri. Skattlagningin er byggð á meðalafkomu greinarinnar og segir í skýrslunni að meðaltal sé ekki nægilega góður mælikvarði á afkomu greinarinnar. Þar sem bæði séu stór og lítil fyrirtæki í sjávarútvegi og allar líkur á því að rekstraafkoma margra fyrirtækja verði lakari en meðaltalsins. Einnig segir í skýrslunni sem IFS gerði fyrir FMÍ að hækkun auðlindaskatts muni væntanlega þvinga fyrirtæki til að sameinast og því auka samþjöppun í greininni. Minni fyrirtæki virðast vera skuldsettari að jafnaði og segir í skýrslunni að útgerðarfélögum sem þurfi að fara í gegnum fjárhagslega endurskipulagningu muni fjölga töluvert við upptöku auðlindaskattsins.
Þá er einnig talið líklegt að sá kvóti sem ætlaður sé til útleigu muni ekki verða leigður af þeim fyrirtækjum sem njóti alls virðisaukans og séu með bæði vinnslu og útgerð. FMÍ muni því ekki fá þennan kvóta til sölu.