Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
01. júlí. 2012 02:54

Ekki verða búferlaflutningar á Bessastöðum

Ólafur Ragnar Grímsson bar sigur úr býtum í forsetakosningunum sem fram fóru í gær, laugardaginn 30. júní 2012. Þrátt fyrir að lokatölur eigi enn eftir að birtast úr öllum kjördæmum er einsýnt og forskot hans á næsta frambjóðanda mun lítið breytast. Ólafur hlýtur samkvæmt nýjustu tölum 51-52% greiddra atkvæða, en Þóra Arnórsdóttir, sem næst honum kom hlaut um þriðjung greiddra atkvæða, Ari Trausti Guðmundsson innan við tíunda hvert atkvæði og aðrir frambjóðendur mun minna. Ólafur Ragnar Grímsson mun því eftir einn mánuð hefja sitt fimmta kjörtímabil og þar með sitja lengst allra forseta Íslands.

Segja má að margt hafi einkennt þessar kosningar. Í fyrsta lagi var kjörsókn mun minni en reiknað hafði verið með, endar líklega í um 70%. Ástæður þess telja sérfræðingar að rekja megi til nokkurra þátta. Í fyrsta lagi að kosningadag bar upp á mikla ferðahelgi og góðviðri um land allt. Í öðru lagi hafi margir ekki sætt sig við þá frambjóðendur sem voru í kjöri og valið að sniðganga kosningarnar. Vafalaust liggja fleiri ástæður að baki.

 

Þá má segja að niðurstaða þessara kosninga sé sláandi lík niðurstöðum skoðanakannana sem framkvæmdar voru síðustu dagana fyrir kjördag. Engin dæmi eru um svo litla skekkju kannana áður. Því er einkar áhugavert þegar kynntur er bakgrunnur þeirra sem svara skoðanakönnunum. Í ljós kemur að nú sótti Ólafur Ragnar Grímsson mest af sínu fylgi, eða 65-68% í raðir sjálfstæðis- og framsóknarmanna, en Þóra Arnórsdóttir sótti að sama skapi mest af sínu fylgi til fylgismanna ríkisstjórnarinnar. Þessi niðurstaða er því söguleg að því leyti að nú í fyrsta skipti á lýðveldistímanum ná hægrimenn að koma því forsetaefni að sem flestir þeirra studdu. Að sá hinn sami skuli vera fyrrverandi formaður Alþýðubandalagsins verður án vafa skráð í sögubækur.

 

Loks er söguleg niðurstaða að sitjandi forseti hefji nú sitt fimmta kjörtímabil og sitji því í allt að 20 árum í embætti forseta Íslands.

 

Þrátt fyrir þessi úrslit kosninganna er ekki hægt að láta hjá líða að minnast á góðan árangur Þóru Arnórsdóttur frambjóðanda sem hlaut í þessum kosningum meira hlutfallslegt fylgi en Vigdís Finnbogadóttir fékk árið 1980 þegar hún var fyrst kosin forseti. Sannarlega athyglisverður árangur hjá 37 ára gamalli, þriggja barna móður.  Að sama skapi munu menn seint verða á eitt sáttir um hvort árangur sitjandi forseta í kosningunum nú sé "glæsilegur," eins og Guðni Ágústsson orðaði það í kosningasjónvarpi RUV fyrr í kvöld, eða naumur varnarsigur. Hvort heldur sem rétt er, breytir ekki því að Ólafur Ragnar Grímsson er rétt kjörinn forseti Íslands til ársins 2016.

 

 

Skessuhorn óskar Ólafi Ragnari Grímssyni til hamingju með kjörið.

Sjónvarp Skessuhorns
Leit á vefnum
Fréttasafn
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is