Á sunnudaginn byrjar landsmót skáta við Úlfljótsvatn en í ár er 100 ára afmæli skátahreyfingarinnar á Íslandi. Ljósmyndari Skessuhorns varð var við að fólk var að byggja stærðarinnar hengirúm í Grundarfirði í gær. Þar voru komin séra Aðalsteinn Þorvaldsson, Jón Þór Magnússon og Sigrún Ella Magnúsdóttir þar sem þau voru að undirbúa sig fyrir landsmótið. „Við vorum að hanna hluta af tjaldbúðinni sem við verðum í. Að setja saman hengirúm sem verður þar, ásamt fjórum öðrum slíkum. Þetta var ákveðin hönnunarvinna, svo við vitum hvað við eigum að gera þegar við komum á staðinn. Við náðum í timbrið sjálf fyrir rúmu ári síðan í Sauraskógi í Helgafellssveit. Þar fengum við leyfi til að grisja aðeins og timbrið er núna þurrt og sterkt,“ segir séra Aðalsteinn.

Skátar víðsvegar um Vesturland munu leggja leið sína að Úlfljótsvatni auk skáta frá öllu Íslandi og utan úr heimi. „Það eru 50 skráðir krakkar frá Akranesi, Borgarnesi og Grundarfirði sem verða í tjaldbúðunum okkar. Landsmótið hefst á sunnudaginn og verður til næsta sunnudags, það er dagskrá alla daga og nóg um að vera,“ segir séra Aðalsteinn í samtali við Skessuhorn.