03. maí. 2013 10:11
Kristján Loftsson forstjóri Hvals hf. staðfestir í samtali við Morgunblaðið í dag að hvalveiðar verði hafnar að nýju í sumar eftir tveggja ára hlé. Nú er síðasta árið af fimm ára leyfi sem í gildi hefur verið frá 2009 um veiðar á langreyðum. Kvótinn nú er 154 langreyðar en auk þess má bæta við hann 20% af óveiddum dýrum frá fyrri vertíð þannig að mögulega verða veidd allt að 180 dýr á þessari vertíð ef vel gengur. Ástæða þess að hvalveiðar fara nú af stað eftir hlé er að byrjað er að rætast úr efnahagsástandinu í Japan, helsta kaupanda hvalaafurða, en hætt var við veiðarnar sökum náttúruhamfaranna þar 2011 og slaks efnahags Japana í kjölfarið. Að sögn Kristjáns Loftssonar er stefnt að því að hvalveiðarnar hefjist fyrri hluta júnímánaðar og standi fram í lok september. Eftir þann tíma verða þær erfiðari m.a. þar sem veiða þarf hvalina í björtu.
Tveir bátar, Hvalur 8 og Hvalur 9, sem bundnir hafa verið við bryggju í Reykjavík síðustu ár, munu stunda veiðarnar líkt og á síðustu hvalavertíðum. Verða bátarnir nú teknir í slipp og gerðir klárir fyrir sumarið. Í frétt Morgunblaðsins er haft eftir Kristjáni að um 150 manns muni fá vinna við veiðarnar og vinnsluna hjá Hval hf. í sumar. Afurðirnar verða unnar í Hvalstöðinni í Hvalfirði, í frystihúsi Hvals í Hafnarfirði og mögulega einnig í Heimaskagahúsinu á Akranesi.