Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
04. nóvember. 2013 04:15

Gamalt myndband sem sýnir Víking AK 100

Gömul litkvikmynd sem sýnir Víking AK 100 sigla til hafnar og leggjast að bryggju í heimahöfninni Akranesi hefur nú verið sett á netið. Hún er tekin sumarið 1978 og því 35 ára gömul. Árið fyrr hafði þessi gamli síðutogari verið sendur til breytinga í nótaskip í Noregi. Víkingur hélt þó áfram búnaði til togveiða enda eru vísbendingar um að skipið sé einmitt á þessari mynd að koma úr kolmunnaveiðiferð þar sem flotvörpunni var beitt.

Í lok kvikmyndarinnar er myndavélinni svo rennt yfir hafnarsvæðið á Akranesi þar sem sjá má að menn eru að reisa nýjan reykháf á Síldar- og fiskimjölsverksmiðju Akraness sem átti og gerði út Víking AK á þessum árum. Þessi reykháfur var reistur sumarið 1978. Tilkoma reykháfsins þótti byltingarkennd búbót á sínum tíma því að 45 metra hæð hans gerði það að verkum að bræðslulyktin, sem sumir kölluðu peningalykt á þeim árum, hvarf að mestu úr híbýlum og utandyra umhverfi bæjarbúa.

 

Um miðbik kvikmyndarinnar þegar Víkingur er að leggjast upp að má sjá hvar Valdimar Indriðason framkvæmdastjóri Síldar- og fiskimjölsverksmiðjunnar hf., Vélsmiðjunnar hf. og Heimaskaga hf. kemur gangandi niður á bryggju til að taka á móti skipinu og áhöfn þess. Hann stendur svo við bryggjukantinn á tali við Guðjón Bergþórsson skipstjóra á Víking. Einnig bregður fyrir skipverjum á Víking.

 

Ekkert hljóð er á myndinni. Skipið virðist hafa verið að koma úr kolmunnatúr þegar myndirnar eru teknar. Sjá má að það er með flotvörpuhlera. Þó nótin sé um borð þá er hún í fremri kassanum sem kallað er. Líklega er þetta á sama tíma og menn stunduðu sumarloðnuveiðar djúpt norður af Íslandi.

 

Sumrin 1977 og 1978 var Víkingur bæði með nót og flotvörpu um borð til að geta veitt hvort heldur loðnu eða kolmunna ef svo bar undir. Íslensk skip stunduðu kolmunnaveiðar um sumartímann á þessum árum austur af landinu. Á sama árstíma var loðnan veidd djúpt norður af landinu. Þetta var í fyrsta sinn sem Íslendingar veiddu kolmunna. Veiðarnar lögðust síðan af. Þær voru ekki teknar aftur upp að nýju fyrr en rétt fyrir aldamótin, um 20 árum síðar.  

 

Kvikmyndin er tekin af Birni Péturssyni, þáverandi skrifstofustjóra Síldar- og fiskimjölsverksmiðjunnar hf. Í haust afhenti hann Héraðsskjalasafni Akraness safn af gömlum kvikmyndum sem hann hafði tekið og verða filmurnar hluti af Ljósmyndasafni Akraness. Er þetta myndskeið frá Akraneshöfn úr þessu safni. Gerður Jóhannsdóttir safnvörður hjá Héraðsskalasafninu setti kvikmyndina á netið á sérstakri rás sem Ljósmyndasafnið hefur sett upp á Youtube myndbandaveitunni. Gerður segir að vel megi búast við að safnið setji fleiri gamlar kvikmyndir á netið í framtíðinni.

 

Hér má skoða þessa 35 ára gömlu kvikmynd:

 

 

Sjónvarp Skessuhorns
Leit á vefnum
Fréttasafn
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Héðan og þaðan
Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is