Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
03. desember. 2013 04:01

Áhersla á grasrótina tryggir betri uppskeru

Frá sumri 2010 hefur Borgnesingurinn Finnur Jónsson leitt starf yngri flokka körfuknattleiksdeildar Skallagríms með góðum árangri. Finnur hefur starfað sem yfirþjálfari yngri flokka fyrir deildina á þessum tíma auk þess sem hann hefur komið að skipulagningu ýmissa annarra verkefnum á hennar vegum. Samhliða hefur hann sinnt þjálfun nokkurra flokka auk þess að þjálfa meistaraflokk kvenna og aðstoðarþjálfun meistaraflokks karla hjá Skallagrími í þrjú ár.

 

 

„Ég var einungis tvítugur þegar ég kom fyrst að þjálfun hjá félaginu árið 1999 en næstu átta ár fékkst ég við þjálfun með hléum,“ segir Finnur sem fékk sitt körfuboltauppeldi hjá Skallagrími. „Á þessum tíma lék ég einnig með meistaraflokki félagsins og má segja að þar hafi áherslan legið. Það blundaði hins vegar í mér áhugi á þjálfun og þar kom að góðum notum leikreynslan úr boltanum,“ bætir hann við. Finnur lék stöðu leikstjórnanda með liðinu og á að baki um og yfir 200 leiki í meistaraflokki. Frá 2007 hefur Finnur þjálfað sleitulaust hjá Skallagrími og þjálfar hann í dag krakka í 1.-4. bekk auk drengja- og unglingaflokks félagsins. „Þá er ég að auki aðstoðarþjálfari meistaraflokks karla í Dominos deildinni.“

 

Orðinn landsliðsþjálfari

Hróður Finns sem þjálfara hefur náð út fyrir Borgarnes á allra síðustu árum en fyrir tæpum tveimur árum var hann ráðinn af Körfuknattleikssambandi Íslands sem þjálfari hjá yngri landsliðum Íslands. „Ég byrjaði að vinna fyrir KKÍ í ársbyrjun 2012 og gerðist aðstoðarþjálfari U16 ára landsliðs kvenna. Þar var ég að aðstoða Tómas Holton sem þjálfaði mig einmitt í Borgarnesi í mörg ár í meistaraflokki. Ég fór með liðinu á tvö mót, fyrst á Norðurlandamót sem fram fór í Solna í Svíþjóð þar sem liðið náði ágætis árangri, sigraði þrjá leiki af fimm. Síðan tók liðið þátt í Evrópumeistaramótinu í C-deild á Gíbraltar og bar kærkominn sigur úr býtum. Í ár fékk ég loks annað landsliðsverkefni sem var að þjálfa U15 lið kvenna. Æft var á fullu síðasta vetur og fór ég með liðinu á Copenhagen Invitational mótið í Danmörku. Stelpurnar gerðu sér lítið fyrir og sigruðu í mótinu og unnu sætan sigur á Dönum í úrslitum,“ segir Finnur.

 

Markmiðin séu á hreinu

Finnur kveðst leggja áherslu á góða og metnaðarfulla þjálfun í sínum störfum sem sé nauðsynlegt að hafa að leiðarljósi ef þjálfa eigi upp öfluga körfuboltamenn. „Fyrir þetta tímabil tók ég saman kennsluskrá fyrir yngri flokka Skallagríms þar sem fram koma áherslur í þjálfun hvers aldursflokks, frá sex til átján ára. Með þessu plaggi er línurnar lagðar fyrir þjálfara félagsins sem vinna samkvæmt skránni. Það er nauðsynlegt að hafa markmiðin á hreinu með þessum hætti svo æfingar verði markvissari og betri og þess vegna er skráin gott „backup“ fyrir bæði þjálfara og iðkendur.“

 

Hann kveðst viða að sér þekkingu til að nota við þjálfun víða. „Þjálfarar á Íslandi eru mikið í tengslum hvorn við annan og læra af hvor öðrum. Hérna heima er t.d. að finna mikla reynslukalla sem maður getur lært af. Síðan er haugur af upplýsingum til á netinu sem maður nær að viða að sér þegar tími gefst til. Ég hef síðan sótt formleg þjálfaranámskeið hjá ÍSÍ og lokið 1. og 2. stigi sem og tekið þátt í þeim námskeiðum sem KKÍ hefur haldið.

 

Vill þjálfa 100%

Um framtíðarmarkmið í þjálfun segir Finnur sig vilja gera ennþá betur og læra meira og meira. „Draumurinn er sá að ég geti gert þetta 100% en í dag sinni ég þjálfuninni meðfram annarri vinnu. Peningar vaxa ekki á trjánum eins og menn þekkja. Sóknarfærin eru hins vegar óþrjótandi í körfuboltaþjálfun á Íslandi. Fagmennskan hefur farið vaxandi á liðnum árum og það sést t.d. í betra gengi karlalandsliðsins okkar, fleiri atvinnumönnum og sterkari deildarkeppni. Vinsældir íþróttarinnar eru líka að aukast. Því meiri áhersla sem lögð er á grasrótina því betri verður uppskeran í framtíðinni,“ segir körfuboltaþjálfarinn Finnur Jónsson að lokum. 

Sjónvarp Skessuhorns
Leit á vefnum
Fréttasafn
Næsta ár Fyrra ár
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Héðan og þaðan
Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is