04. desember. 2013 10:38
Búast má við miklu frosti á landinu næstu daga ef marka má veðurspár. Tryggingafélagið VÍS vill skora á eigendur sumarhúsa í Borgarfirði og á Suðurlandi að gæta að frágangi vatnslagna því fjölmörg dæmi eru um frostskemmdir við þessar aðstæður þegar saman fer mikið frost og vindur. Einar Sveinbjörnsson hjá Veðurvaktinni segir frostið geta orðið 15 til 22 gráður frá því seinnipartinn á morgun fimmtudag og fram á föstudag, en eftir það tekur að hlýna á ný. „Á Suður- og Vesturlandi eru rúmlega 70% sumarhúsa á landinu og mikilvægt að eigendur þeirra séu meðvitaðir um hættuna á því að frjósi í lögnum. Lítill snjór á jörðu eykur svo enn frekar áhættuna,“ segir í tilkynningu frá VÍS.
Þá segir að vatnstjón í sumarhúsum verði oft mjög alvarleg, einkum ef heitt vatn fer að leka í frostsprungnum lögnum. Oft uppgötvast skaðinn ekki fyrr en dögum eða jafnvel vikum eftir að frostskemmdir verða. Í verstu tilfellunum hafa hús og innbú eyðilagst. Vatnsvarnir eru því gríðarlega mikilvægar í sumarhúsum. Ef hús er hitað upp með vatni er öruggast að hafa lokað hringrásarkerfi. Muna þarf að skrúfa ávallt fyrir neysluvatn þegar hús er yfirgefið og tæma lagnir t.d. með því að skrúfa frá krana inni þar til hættir að renna. Vissara er fyrir sumarhúsaeigendur að huga að híbýlum sínum í tengslum við þennan frostakafla og minnast þess að oft byrjar ekki að leka fyrr en hlýna tekur á ný.
Nánari upplýsingar um öryggi í sumarhúsum er að finna á www.vis.is