Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
22. desember. 2013 10:36

Óbyggðanefnd birtir þjóðlendukröfur í Borgarfirði

Íslenska ríkið birti í Lögbirtingablaðinu 18. desember síðastliðinn kröfur í svokallaðar þjóðlendur fyrir Mýra- og Borgarfjarðarsýslu. Ríkið gerir í kröfum sínum tilkall til nánast allra afrétta í héraðinu auk þess að vilja taka eignarnámi stóran hluta úr einkalöndum bænda og landeigenda. Nú hefur því Bjarni Benediktsson, fjármála- og efnahagsráðherra fyrir hönd íslenska ríkisins, afhent óbyggðanefnd kröfur sínar um þjóðlendur á svokölluðu svæði 8, sem er vestur ‒ Mýra- og Borgarfjarðarsýsla að undanskildum Kolbeinsstaðahreppi ásamt Langjökli. Óbyggðanefnd, sem er sjálfstæður úrskurðarnefnd á stjórnsýslustigi, kynnir með auglýsingu í Lögbirtingi þessar kröfur í þeim tilgangi að ná til þeirra sem kunna að eiga öndverðra hagsmuna að gæta en fyrirfram má búast við því að það verði margir sem verja munu hagsmuni sína gegn ríkinu. Í stuttu máli er þjóðlendukröfum lýst þannig af hálfu lögmanns fjármála- og efnahagsráðherra:

 

 

Í Borgarfjarðarsýslu er gerð krafa um svæði sem kallað er Geitland, en það afmarkast af Langjökli að austan, Hafragili og Hvítá að norðan og Geitá að vestan. Þá er í Borgarfjarðarsýslu einnig gerð krafa til svæðis sem nefnt er afréttur Lunddæla og Andkílinga ásamt vesturhluta Þórisjökuls. Það afmarkast af merkjalýsingum aðliggjandi jarða og Geitlandi, að austanverðu afmarkast það af sýslu- og sveitarfélagamörkum og að sunnan af Reyðarlæk, Reyðarvatni og Grímsá, að ármótum hennar og Lambár. Þá er gerð þjóðlendukrafa til Langjökuls, miðað við stöðu jökulsins þann 1. júlí 1998.

 

Í Mýrasýslu eru gerðar kröfur til eftirfarandi afréttarsvæða: Afréttarsvæði Hraunhrepps, Álftaneshrepps, Hrafnabjarga og Borgarhrepps ásamt Staðartungu og Beilárheiði, sem afmarkast af merkjalýsingum aðliggjandi jarða og afréttarsvæðanna, og sýslumarka við Snæfellssýslu að vestan og Dalasýslu að norðan. Ystutunguafréttur sem afmarkast af merkjalýsingum aðliggjandi jarða og afréttarsvæða og sýslumarka Dalasýslu að norðan. Miðdælingaafréttur/ Sauðafellsafréttur/ Fellsendaafréttur  sem afmarkast við merkjalýsingar aðliggjandi jarða og afréttarsvæða og sýslumarka Dalasýslu að norðan.  Sameiginlegt afréttarsvæði Stafholtstungna sunnan Norðurár, Hellistungur, Þverárhlíð og Hvítársíða, auk Lambatungna, Arnarvatnsheiðar og sameignarlands Kalmanstungujarða.  Þetta svæði afmarkast af merkjalýsingum aðliggjandi jarða eins og þær eru viðurkenndar af hálfu íslenska ríksins, merkjalýsingum afréttarsvæðanna og sýslumarka Húnavatnssýslna og Strandasýslu að norðan og austan. Nákvæma afmörkun og yfirlitskort er að finna á heimasíðu  óbyggðanefndar (obyggdanefnd.is) og á skrifstofum viðkomandi sveitarfélaga og sýslumannsembætta.

 

Í fréttatilkynningu sem Þorsteinn Magnússon framkvæmdastjóri Óbyggðanefndar sendir frá sér skömmu fyrir jól segir orðrétt: „Kröfur þessar voru birtar með lögformlegum hætti í Lögbirtingablaðinu miðvikudaginn 18. desember. Þar er skorað á þá sem telja til eignarréttinda á þjóðlendukröfusvæðis ríkisins að lýsa kröfum sínum skriflega fyrir  byggðanefnd innan þriggja mánaða, nánar tiltekið í síðasta lagi fimmtudaginn 20. mars 2014.

 

Að loknum framangreindum fresti fer fram opinber kynning á heildarkröfum (ríkis og annarra) sem stendur í einn mánuð.  Einnig er svæðinu skipt í mál og boðað til fyrstu fyrirtöku. Mál eru síðan tekin fyrir eins oft og þörf er á, frekari gögn lögð fram og leitast við að skýra þau að öðru leyti. Loks fer fram svokölluð aðalmeðferð, með tilheyrandi vettvangsskoðun, skýrslutökum og  álflutningi. Að lokinni aðalmeðferð eru mál tekin til úrskurðar og úrskurður kveðinn upp í kjölfarið.

 

Verkefni óbyggðanefndar er að úrskurða um annars vegar kröfur fjármála- og efnahagsráðherra fyrir hönd ríkisins og hins vegar kröfur þeirra sem telja sig eiga öndverðra hagsmuna að gæta, nánar tiltekið  um 1) hvaða land telst til þjóðlendna og hver séu mörk þeirra og eignarlanda,  2) hver séu  mörk þess hluta þjóðlendu sem nýttur er sem afréttur og 3) hver séu eignarréttindi innan þjóðlendu. Þess skal loks getið að óbyggðanefnd hefur þegar lokið umfjöllun um eignarlönd og þjóðlendur á 70% af landinu öllu og 86% lands á miðhálendinu, samkvæmt skipulagslegri skilgreiningu á því hugtaki.“

 

Fjallað verður ítarlega um málið í Skessuhorni sem kemur út 3. janúar næstkomandi og rætt við fulltrúa heimamanna sem eru málinu kunnugir og þeir spurðir um viðbrögð hagsmunaaðila.

Sjónvarp Skessuhorns
Leit á vefnum
Fréttasafn
Næsta ár Fyrra ár
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Héðan og þaðan
Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is