Feðgarnir Arilíus Sigurðsson og Dagbjartur Arilíusson, sem rekið hafa Bíla- og Vélasöluna Geisla í Borgarnesi undanfarin 15 ár, hafa tekið ákvörðun um að hætta rekstri hennar. Í síðustu viku luku þeir við að hreinsa lóðina Fitja 2 við gatnamót Snæfellsnessvegar og hringvegarins þar sem Geisli hefur verið með starfsemi frá upphafi, en fyrirtækið gerði samning fyrir skemmstu um skil á lóðinni til Borgarbyggðar. Að sögn Dagbjartar vilja þeir feðgar benda viðskiptavinum Geisla á bílasöluna Bílás á Akranesi vegna nýskráninga á bifreiðum í framtíðinni og RAG ehf. (rag.is) í Hafnarfirði varðandi skráningar á vinnuvélum. Hann sagði jafnframt að þessa dagana sé verið að vinsa úr bíla- og vélaflota Geisla og er hluti hans nú geymdur tímabundið á lóð í eigu Arilíusar á gatnamótum Hrafnakletts og hringvegarins í Borgarnesi þar sem Vinakaffi var áður til húsa.