26. mars. 2014 02:22
Framtíð leikskólanna í landinu var rædd á stefnumótunarfundi sem Samband íslenskra sveitarfélaga, Félag leikskólakennara og Félag stjórnenda leikskóla stóð fyrir í Hjálmakletti í gær. Tilefni fundarins er bókun í kjarasamningi sömu aðila frá 2011 þar sem kallað var eftir umræðu um sameiginlega framtíðarsýn leikskólanna í landinu. Fundurinn er fyrsti fundurinn af átta sem þessir aðilar halda á næstunni víðsvegar um landið, en fundað verður á Reykjanesi, Blönduósi, Reykjavík, Akureyri, Ísafirði, Selfossi og Egilsstöðum. Það er Capacent sem stýrir framkvæmd fundanna.
Að sögn Ingibjargar Kristleifsdóttur, formanns Félags stjórnenda leikskóla, voru á fimmta tug þátttakenda á fundinum í Borgarnesi. Um fjölbreyttan hóp Vestlendinga var að ræða en meðal þátttakenda var sveitarstjórnarfólk, leikskólakennarar, leikskólastjórnendur og foreldrar leikskólabarna. Í upphafi fundarins flutti framhaldsskólaneminn Halldór Logi Sigurðsson stutt inngangserindi þar sem hann deildi sinni sýn á framtíðarleikskólanum og sagði Ingibjörg að erindi hans hafi vakið athygli hjá fundarmönnum. Hún segir að afrakstur fundaraðarinnar verði stefnuskjal sem er hugsað sem grundvöllur að framtíðarsýn leikskólans, með leiðum og aðgerðum um það hvernig leikskólastarfi verði best hagað með hagsmuni leikskólabarna að leiðarljósi í framtíðinni.