Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
04. júní. 2014 05:50

Framkvæmdir hafnar við byggingu heilsárshótels á Húsafelli

Framkvæmdir eru hafnar við byggingu hótels á Húsafelli í Borgarfirði. Staðsetning þess er einstök því hótelið verður að hluta til fellt inn í landið í skógivöxnu landi í hjarta staðarins ofan við sundlaugina. Á hótelinu, sem verður um 1.800 fermetrar að grunnfleti, verða 36 rúmgóð tveggja manna herbergi, þar af sex svítur. Í hótelinu verður gestamóttaka, bar og bjartur og fallegur veitingastaður með útsýni yfir Húsafell og til fjalla. Á neðri hæð verður sér inngangur sem tengist með aðkomutorgi við sundlaugina, golfvöllinn og þjónustumiðstöðina á staðnum. Þar verður miðstöð náttúruskoðunar og útivistar. Góð aðstaða verður fyrir búnað til jöklaferða, hellaskoðunar og gönguferða. Á hæðinni er einnig fjölnota salur sem hentar afar vel til sýninga af ýmsu tagi og til fundahalda. Arkitektar að byggingunni eru starfsmenn Teiknistofunnar Óðinstorgi en aðalverktaki verður Eiríkur J Ingólfsson húsasmíðameistri í Borgarnesi. Áætlað er að hótelið verði opnað í júní 2015.

 

 

 

Hótelið á Húsafelli verður alfarið í eigu heimamanna á Húsafelli og fjármagnað í samstarfi við Landsbanka Íslands. Þórður Kristleifsson er verkefnisstjóri við bygginguna, en hann er auk þess menntaður í hótelrekstri í Sviss. Þórður segir að uppgröftur og jarðvegsskipti séu nú í gangi en innan tíðar fari byggingarframkvæmdir á fullan skrið. Hann kveðst afar bjartsýnn á að vel gangi að markaðssetja hótel á þessum stað eins og horfurnar eru í ferðaþjónustu hér á landi og ekki síst í Borgarfirði. „Húsafell er ein af tilkomumestu náttúruperlum Íslands sem jafnan er sett í flokk með vinsælum áfangastöðum eins og Mývatni og Skaftafelli. Töluverður fjöldi fólks nýtir sumarhúsabyggð hér á svæðinu og þá þjónustu sem nú er boðið uppá svo sem sundlaug, veitingastað og golfvöll. Heilsárs hótel mun stuðla að áframhaldandi uppbyggingu á svæðinu sem miðar að gæðum sem kallað hefur verið eftir af hagsmunaaðilum í ferðaþjónustu á Íslandi,“ segir Þórður.

 

Hann segir að Húsafell og nágrenni dragi að sér um það bil 80 þúsund ferðamenn á ári. „Möguleikar svæðisins til frekari uppbyggingar í ferðaþjónustu eru því miklir enda hefur svæðið uppá flest það að bjóða sem ferðamenn sækjast eftir. Sem dæmi má nefna fjölbreytta og einstæða jarðsögu, ríka menningarsögu, listaverkasafn og fleira. Með samstilltu átaki er hægt að auka straum og tekjur af ferðamönnum á Húsafelli og í uppsveitum Borgarfjarðar, enda ríkir þar mikill samhugur og ýmis verkefni eru þegar í undirbúningi. Hægt er að nefna verkefnið Saga Jarðvangur. Nú er unnið að gerð ísganga í Langjökli hér skammt ofan við Húsafell, í undirbúningi er bygging veitingastaðar við Deildartunguhver, verið er að skoða uppbyggingu náttúrubaða við Brúarás, bætta aðstöðu við Hraunfossa og áfram mætti telja. Fólk er að sjá að skynsamlegt er að fjárfesta í uppbyggingu í ferðaþjónustu í Borgarfirði,“ segir Þórður.

 

Undanfarin misseri hefur mikið verið fjallað um álag á ferðamannastöðum á Suðurlandi og þörfina fyrir að dreifa álagi sem skapast af fjölgun erlendra ferðamanna á tiltölulega litlu svæði um sunnanvert landið. „Húsafell og Vesturland í heild er ákjósanlegur valkostur sem mótvægi við Suðurland enda hefur svæðið allt til að bera sem erlendir ferðamenn sækjast eftir á Íslandi. Uppbygging Kaldadalsvegar er að mati forsvarsmanna ferðaþjónustu á Húsafelli einn af lykilþáttunum í þessu sambandi,“ segir Þórður Kristleifsson að endingu.

Sjónvarp Skessuhorns
Leit á vefnum
Fréttasafn
Næsta ár Fyrra ár
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is