Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
15. október. 2014 12:40

Nýr Baldur kominn til Íslands

Nýjasta eintakið af flóabátnum Baldri sigldi inn á Reykjavíkurhöfn snemma í gærmorgun að lokinni þriggja og hálfs sólarhrings siglingu frá Svolvær við Lófót í Norður Noregi. Skipið hét áður Vågan og var gert út til ferjusiglinga á Lófótsvæðinu um árabil. Sex menn sigldu skipinu heim, fimm Íslendingar og einn Norðmaður sem var vélstjóri og á vegum norsku útgerðarinnar sem seldi skipið til Sæferða í Stykkishólmi. Nú taka við viðgerðir á skipinu áður en því verður haldið inn Breiðafjörð til siglinga frá Stykkishólmi.

Skipið fer vel í sjó

Siggeir Pétursson stýrði skipinu á heimsiglingunni ásamt Pétri Ágústssyni föður sínum. Blaðamaður Skessuhorns hitti Siggeir að máli í gær um borð í skipinu í Reykjavíkurhöfn. „Þetta skip er smíðað 1979. Það er 68 metra langt og 12 metra breitt. Helsti munur á því og síðasta Baldri, sem hefur verið í notkun þar til nú, er að bílaþilfar á þessu skipi er miklu stærra. Það er bæði hærra og breiðara. Þannig eru möguleikar að taka fleiri bíla. Við getum tekið 15 fleiri fólksbíla og sex flutningavagna í stað fimm í gamla skipinu. Þetta er helsti munurinn hvað þetta varðar. Annars eru skipin álíka löng,” segir Siggeir.

Siglingin heim til Íslands gekk mjög vel að sögn Siggeirs. Fyrsta reynslan af því er afar góð. „Við fengum gott veður, það var bara smá undiralda en skipið valt lítið. Það er hljóðlátt og fer vel með mannskapinn.”

 

Endurbætt í Reykjavík

Hinum nýja Baldri var ekki siglt til heimahafnar í Stykkishólmi heldur var haldið beint til Reykjavíkur þar sem skipið verður tekið upp í slipp. Það þarf að gera nokkrar endurbætur áður en það fer í fulla notkun til siglinga um Breiðafjörð.

„Nú er framundan að snyrta til í farþegasölum og fleira smálegt. Það þarf líka að setja krana á skipið til að koma vörum á land og um borð í Flatey á Breiðafirði. Sumu sem við ætlum að gera þurfum við reyndar að fresta aðeins vegna þess að við urðum fyrir töfum á innflutningi skipsins vegna leyfisveitinga í stjórnkerfinu hér á landi. Við gerum það helsta núna áður en skipið verður tekið í notkun. Svo höldum við áfram að laga ýmislegt annað síðar í vetur með næsta sumar í huga.“

Siggeir segir að nýi Baldur verði tekinn í notkun á allra næstu vikum um leið og skipið er tilbúið. Með því mun væntanlega hefjast nýr kafli í flóasiglingum um Breiðafjörðinn.

Sjónvarp Skessuhorns
Leit á vefnum
Fréttasafn
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Héðan og þaðan
Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is