Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
06. apríl. 2015 09:00

Myndir: Áhöfn Þórsness SH undirbýr netarall í Faxaflóa

„Það er óhemju af þorski í Breiðafirði. Reyndar skruppum við aðeins suður á Eldeyjarbanka að reyna við ufsa en það gekk ekki nógu vel. Það var lítið af honum þar en mjög mikið af þorski. En hér í Breiðafirði er bara þorskmok. Við lögðum tvisvar í þessari viku og fengum fyrst fjörutíu tonn og svo þrjátíu tonn í sex trossur. Við leggjum bara á morgnana og byrjum svo að draga strax aftur. Netin eru ekki látin liggja í sjó að heitið geti,“ sagði Margeir Jóhannesson skipstjóri á Þórsnesi SH 109.

 

Ralla með netin í Faxaflóa

Þegar blaðamaður Skessuhorns kom á bryggjuna á fimmtudagsmorgun í liðinni viku vakti athygli að áhöfn Þórsness var greinilega að vinna við að taka veiðarfæri um borð. Þórsnes stundar netaveiðar eftir áramót en er haldið til línuveiða á haustin og í lok hvers árs. Nú voru þeir á Þórsnesinu greinilega útbúa skipið fyrir netaveiðar. Margeir skipstjóri útskýrði að þeir væru að undirbúa þátttöku skipsins í hinu svokallaða netaralli Hafrannsóknastofnunar. Þá eru eru nokkrir netabátar fengnir til vísindaveiða með þorskanetum. Þessar veiðar eru meðal annars liður í stofnstærðarmati stofnunarinnar. Net með mismunandi möskvastærðum eru lögð á fyrirfram ákveðnum stöðum. Síðan er skráð hvað veiðist í þau.

 

 „Við á Þórsnesinu verðum í Faxaflóa. Magnús SH frá Hellissandi verður svo við sömu rannsóknaveiðar í Breiðafirðinum. Við byrjum á að leggja netin á sunnudag. Núna erum við að gera klárt, taka netin um borð og það sem fylgir. Við byrjum við Malarrifið og færum okkur svo sunnar. Líklega geymum við bátinn svo á Akranesi yfir páskana,“ sagði Margeir.

 

Vonast eftir kvótaaukningu

Góð þorskveiði í vetur og reyndar undanfarnar vertíðir skapar væntingar um að þorskkvótinn verði nú aukinn í ár. „Það skulum við vona. Þorskveiðin nú í vetur ætti að segja manni það. Aflabrögðin hafa verið frábær í öll veiðarfæri. Maður hefur til dæmis aldrei heyrt svona tölur eins og eru búnar að vera í aflabrögðunum á línuna. Þetta er alveg ótrúlegt.“

 

Greina mátti glaðværa tilhlökkun hjá skipverjum á Þórsnesinu þar sem þeir gerðu klárt fyrir netarallið. Þessar vísindaveiðar eru ávísun á góðar tekjur og menn þurfa ekki að hafa áhyggjur af kvótastöðu bátsins meðan á þeim stendur. „Það sem við veiðum af kvóta bátsins fer mest í saltfiskvinnslu útgerðarinnar hér í Stykkishólmi. Það sem ekki er saltað fer svo á markað. Fiskurinn úr netarallinu fer hins vegar allur á markað og verðmætinu skipt milli Hafrannsóknastofnunar, útgerð og áhafnar. Sá afli dregst ekki af kvóta bátsins,“ sagði Margeir Jóhannesson.

 

Nýbakaður afi

Niðri á milliþilfari Þórsness stóð Þorsteinn Kúld sjómaður og frístundabóndi í Stykkishólmi og sinnti netadrættinum um borð. „Það er fínt að vera hér um borð. Í haust og fram að jólum stundum við veiðar norðanlands, löndum þá alltaf á Raufarhöfn og förum heim í frí þriðju hverja helgi. Það eru ágætis tekjur á þessu. Nú er það netavertíðin og svo er það bara sauðburðurinn í vor. Þá byrjar lífið,“ sagði Þorsteinn kankvís á svip. Aðspurður segist hann halda um 20 vetrarfóðraðar ær sér til gamans.

Þorsteinn Kúld hafði annars ærna ástæðu til að gleðjast þennan dag. Dóttir hans hafði eignast barn og Þorsteinn var að drífa sig suður til Reykjavíkur til að hitta barnabarnið fyrsta sinni.

 

Fluttu vestur án eftirsjár

Alls eru 12 menn í áhöfn Þórsness. Margeir skipstjóri tók við skipinu 2010. Áður hafði hann starfað sem skipstjóri á dragnótarbátum um áratuga skeið frá Suðurnesjum. Hópur sjómanna þaðan fylgdi Margeiri þaðan um borð í Þórsnes.Nú hafa margir þeirra flust búferlum og sest að í Stykkishólmi. Sjálfur flutti Margeir í Helgafellssveitina á síðasta ári. „Þetta er svona millileikur. Ég nefnilega fæddur og upp alinn í Ólafsvík. Stökkið var því of stórt fyrir mig að flytja í Hólminn en ég fór í sveitina,“ sagði hann og hló við.

 

Oscar Gunnar Burns vélstjóri á Þórsnesinu stýrði krana um borð. „Ég hef verið á Þórsnesinu í fimm ár en flutti hingað í Stykkishólm í fyrrahaust með alla fjölskylduna. Við komum úr Vogum á Vatnsleysuströnd. Það er mjög gott á búa hér. Konan mín starfar sem sjúkraliði á dvalarheimilinu hér í Stykkishólmi og börnin eru mjög ánægð. Það var svo sem fínt að búa í Vogunum en þetta er enn betra hér í Hólminum.“ Patryk Garðarsson félagi Oscars stóð við hið hans og tók undir þessi orð: „ Ég er búinn að eiga heima hér í þrjú ár. Það er mjög fínt að vera á þessum bát. Þetta er gott pláss,“ sagði Patryk.

 

Þórsnes verður á netum fram í maí. Þá er ráðgert að línuveiðar taki aftur við fram í júní. Síðan verður tekið gott sumarfrí fram á haustið.

 

Grein þessi birtist í nýjasta Skessuhorni. Fletta má í ljósmyndum af þeim á Þórsnesi sem fylgja greininni með því að smella á myndina hér fyrir ofan.  

Sjónvarp Skessuhorns
Leit á vefnum
Fréttasafn
Næsta ár Fyrra ár
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is