Vormót Fimleikasambands Íslands í hópfimleikum var haldið á Egilsstöðum um síðustu helgi, 16.-17. maí. Mótið var fyrir fimmta til fyrsta flokk og alls tóku 53 lið frá 13 félögum þátt. Keppendur voru því um sexhundruð talsins og mótið með þeim fjölmennustu sem haldið er á vegum Fimleikasambands Íslands.

Fimleikafélag Akraness sendi lið til keppni í þriðja flokki stúlkna. Þriðji flokkur stúlkna samanstendur af keppendum 12-13 ára en vert er að nefna að fjórar þeirra sem kepptu með FIMA á mótinu eru aðeins 11 ára gamlar. Liðið féll úr A-deild á Íslandsmótinu í febrúar og keppti því í B-deild að þessu sinni og stóð uppi sem sigurvegari. „Stelpurnar stóðu sig með prýði og unnu B-deildina,“ sagði Brynjar Sigurðsson, annar þjálfara stúlknanna, í samtali við Skessuhorn og bætir því við að þær eigi framtíðina fyrir sér. „Þetta eru mjög efnilegar stúlkur og ég á von á að þær berjist við bestu liðin á komandi árum. Við vissum alltaf að þetta ár gæti orðið erfitt fyrir okkur vegna þess að stelpurnar eru nær allar á yngra ári í þriðja flokki og meira að segja eru fjórar að keppa upp fyrir sig. Sterkustu mótherjar þeirra eru flestir að minnsta kosti árinu eldri.“