Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
07. júlí. 2015 11:40

Hvanneyrarhátíð á laugardaginn

„Hátíðin hefur verið árleg, alltaf haldin í kringum Hinn íslenska safnadag. En nú er búið að færa hann svo það eru fleiri en Landbúnaðarsafnið sem koma að henni að þessu sinni,“ sagði Bjarni Guðmundsson, ábyrgðarmaður Landbúnaðarsafnsins á Hvanneyri, í samtali við Skessuhorn. Bjarni er einn af skipuleggjendum hátíðarinnar sem fram fer laugardaginn 11. júlí næstkomandi og þegar blaðamaður spurði út í nafn hennar hló Bjarni við og kvað hátíðina í raun ekki heita neitt sérstakt. Þetta væri bara staðarhátíð á Hvanneyri, dagamunur í sveit sem hann kæmi að því að skipuleggja ásamt vel völdum hópi heimamanna.

 

 

„Landbúnaðarsafnið verður opið sem og Ullarselið. Við hér í safninu höldum upp á 70 ára afmæli Farmal-dráttarvélarinnar á Íslandi með minningarstund þar sem slegið verður með einum 70 ára gömlum,“ segir Bjarni. „Auk þess mun umboðsaðili Farmal í heiminum sýna okkur þann allra nýjasta,“ bætir hann við.

Landbúnaðarsafnið efnir til örnámskeiðs um fornslátt að morgni dags og er það liður í hátíðinni. Námskeiðið er að sögn Bjarna óðum að fyllast. „Þar verður þátttakendum kennt að slá með orfi og ljá,“ segir hann.

 

Tvær litlar leirlistasýningar standa gestum opnar á meðan hátíðinni stendur. Elísabet Haraldsdóttir mun sýna á kaffihúsinu Skemmunni og sýning Ólafar Erlu Bjarnadóttur verður í Landbúnaðarsafninu. „Síðan verður markaður í bænum þar og Guðrún Bjarnadóttir mun kynna jurtalitun. Þarna verður ýmislegt til afþreyingar fyrir gesti og gangandi. Kvenfélagskaffi auk þess sem Skemman verður opin,“ segir Bjarni.

 

Að kvöldinu verður blásið til hljómleika í hlöðu Halldórsfjóss þar sem hljómsveitin Veturhús mun leika blöndu af eigin efni og ábreiðum. „Þetta byggist á því að maður sé manns gaman,“ segir Bjarni.

 

Vert er að geta þess að laust eftir hádegi, klukkan 13:30 við Hvanneyrarkirkju, mun Sigmundur Davíð Gunnlaugsson forsætisráðherra með formlegum hætti friðlýsa gömlu bæjartorfuna á Hvanneyri ásamt minjum, flæðiengjum og fitjum á bökkum Hvítár. Mun þetta vera í fyrsta sinn sem húsaminjar og menningarheildir eru friðlýstar.

 

Sjónvarp Skessuhorns
Leit á vefnum
Fréttasafn
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is