Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
17. ágúst. 2015 09:01

Telur skógrækt og sauðfjárrækt fara vel saman

Þórarinn Ingi Pétursson, formaður Landssamtaka sauðfjárbænda hélt erindi á 80. aðalfundi Skógræktarfélags Íslands sem fram fór í Hofi á Akureyri um liðna helgi. Yfirskrift erindisins var, „Eiga skógrækt og sauðfjárrækt samleið?“ Langstærstur hluti íslenskra birkiskóga er á löndum bænda og er víðast í framför. Sauðfjárbændur hafa undanfarna áratugi gert árangursríkar tilraunir með skógarbeit þar sem skynsamleg og nútímaleg beitarstjórnun hefur skilað góðum árangri. Hagsmunir sauðfjárbeitar og skógræktar fara þar augljóslega saman, að mati Þórarins Inga.

Formaður LS bauð í erindi sínu skógræktarfólki til samstarfs um að kanna grundvöll þess að hefja sérstakt átak í ræktun íslenskra beitarskóga. Hugmyndin er sú að Landssamtök sauðfjárbænda, Skógræktarfélag Íslands, Skógrækt ríkisins, Landgræðsla ríkisins, Bændasamtök Íslands, Landssamtök skógareigenda og Umhverfis- og auðlindaráðuneytið komi að sama borði. Með velheppnuðu samstarfi megi á næstu árum og áratugum setja stóraukinn kraft í skógrækt í landinu, bæta beitarland, fjölga trjám og stækka íslenska skóga.

 

 

 

Birkiskógar í sókn

Fram kom í erindi Þórarins Inga að birkiskógur þeki um 1,5% af Íslandi en væri einungis litið til láglendis fari þetta hlutfall upp í 4%. Talið er að fjórðungur lands hafi verið skógi vaxinn við landnám. Samkvæmt nýlegri stefnumótun á vegum Skógræktar ríkisins er stefnt að því að skógur þeki 12% lands um næstu aldamót, sem yrði mikilvægt skref til þess að Íslendingar nái loftslagsmarkmiðum sínum. Birki hleypir meira ljósi niður í gegnum trjákrónuna en flestar aðrar tegundir og botngróður er því oft ríkulegur í birkiskógum. Birkiskógar á afréttum eru víða í framför og í fyrsta skipti frá landnámi eru birkiskógar á almennu framfaraskeiði.

 

Bændur eru vörslumenn landsins

Með skynsamlegri og virkri beitarstýringu vaxa og dafna beittir birkiskógar víða um land. Um 80% af öllum birkiskógum landsins eru á löndum bænda. Verulegur hluti þeirra er nýttur til sauðfjárbeitar líkt og gert er í sambærilegum skógum í Norður-Skandinavíu og á heimskautasvæðum Rússlands. Árangur af slíkri nýtingu er almennt góður. Gróður á skógarbotni vex vel og skógurinn verður greiðfærari. Dæmi eru um að fallþungi lamba sem ganga í sjálfbæran og skynsamlega nýttan skóg með virkri beitarstýringu geti verið allt að þriðjungi meiri en ella. Þetta helgast bæði af góðri beit á skógarbotninum og eins því að féð nýtur skjóls af trjánum og getur því nýtt meiri orku til vaxtar. Á sama tíma dafnar skógurinn.

 

Beitarskógar treysta byggð

„Sauðfjárrækt á fjölskyldubúum er hryggjarstykkið í hinum dreifðu byggðum landsins. Hún hefur beina og sterka tengingu við menningu þjóðarinnar bæði fyrr og nú. Aðrar atvinnugreinar njóta góðs af sambýlinu við sauðfjárræktina. Hreinleiki lands og náttúru endurspeglast í íslensku lambakjöti þar sem hefðirnar fá að njóta sín um leið og greinin hefur í mörgu tileinkað sér bestu vísindi og tækni sem völ er á. Íslenska sauðféð er einstakt og gefur af sér afurðir sem eru meðal þessa allra besta sem þekkist í veröldinni. Reglur um dýravelferð eru hér strangari en annars staðar og fjölbreytni og sjálfbærni eru lykilforsendur nútíma sauðfjárræktar á Íslandi. Átak í ræktun beitarskóga fellur vel að þessari mynd og getur skotið fleiri stoðum undir íslenska sauðfjárrækt og þar með gjaldeyrisaflandi og sjálfbærri búsetu um land allt,“ sagði Þórarinn Ingi Pétursson formaður LS.

Sjónvarp Skessuhorns
Leit á vefnum
Fréttasafn
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is