Víkingur Ó. mætti Grindavík suður með sjó í lokaleik B riðils fyrstu deildar kvenna í knattspyrnu síðastliðið miðvikudagskvöld. Leik liðanna fyrr í sumar lauk með 2-2 jafntefli á Ólafsvíkurvelli en fyrir leikinn núna var ljóst að Víkingur ætti ekki möguleika á sæti í úrslitakeppni um laust sæti í úrvalsdeild að ári. Grindvíkingar voru aftur á móti öruggir með sæti í þeirri keppni og því í sjálfu sér ekki að miklu að keppa á Grindavíkurvelli.

Heimamenn voru sterkari aðilinn í leiknum. Marjani Hing-Glover kom þeim yfir á lokamínútu fyrri hálfleiks og bætti síðan öðru marki við á 59. mínútu. Guðrún Bentína Frímannsdóttir innsiglaði svo 3-0 sigur Grindvíkinga á 71. mínútu og tryggði Grindvíkingum toppsæti riðilsins.

Leikmenn Víkings Ó. ljúka því keppni í Íslandsmótinu í ár í fjórða sæti B riðils með fimm sigra, þrjú jafntefli og fjögur töp, sem verður að teljast viðunandi árangur í ljósi þess að þetta er aðeins þriðja tímabilið sem liðið tekur þátt í Íslandsmótinu í knattspyrnu.