Forsíða
Auglýsing
Rss straumur af fréttum frá Skessuhorni
Lágnætti. Fjórði Laugardagur í Haustmánuði
Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
17. febrúar. 2016 12:30

Ákvæði nýs skipulags Breiðarsvæðis kynnt á íbúafundi

Bæjarstjórn Akraness hélt í gærkvöldi kynningarfund um tillögu að breytingu á deiliskipulagi Breiðarsvæðis þar sem HB Grandi óskar eftir að byggja framtíðarhúsnæði yfir starfsemi Laugafisks. Ágæt mæting var á fundinn, en salurinn í Tónbergi var á að giska hálfsetinn. Markmið fundarins var að kynna fyrir íbúum og hagsmunaaðilum tillögu að breytingu á deiliskipulagi Breiðarsvæðis sem felur meðal annars í sér að sameina og stækka fiskþurrkun HB Granda á einn stað við Breiðargötu í stað tveggja staða nú. Tillagan var kynnt m.t.t. þeirra breytinga sem orðið hafa á henni auk umhverfisskýrslu og þeirra markmiða sem HB Grandi hefur sett varðandi umhverfismál.

Ferli tillögunnar

Regína Ásvaldsdóttir bæjartjóri fór í upphafi yfir þann feril sem deiliskipulag mun fara í stjórnkerfinu. Nú er tillagan í auglýsingaferli og rennur frestur til að gera athugasemdir við deiliskipulagið út 30. mars næstkomandi. Eftir frest mun umhverfis- og skipulagsnefnd fara yfir athugasemdir og bæjarstjórn í kjölfarið. Ef deiliskipulagið verður samþykkt mun HB Grandi sækja um byggingarleyfi og sækja um starfsleyfi til Heilbrigðiseftirlits Vesturlands.

 

Áfram hver sem afgreiðslan verður

Vilhjálmur Vilhjálmsson forstjóri HB Granda fór yfir aðdraganda þess að fyrirtækið sækir um að byggja yfir og auka starfsemi Laugafisks á Akranesi. Nefndi hann í máli sínu að óvissa um framtíð fyrirtækisins væri farin að fara illa í starfsfólk og bitnaði á starfseminni. Því fagnaði hann því að málið væri komið í þann farveg sem það er nú. Hjá Laugafiski starfa 25-30 manns við vinnslu, þurrkun og pökkun. Nú væru allar framkvæmdir og fjárfestingar í lágmarki og verða það uns niðurstaða fæst um hvort af áformum um stækkun verður. Í fyrirspurnum á fundinum svaraði Vilhjálmur því afdráttarlaust að jafnvel þótt sú tillaga sem nú liggur frammi um breytingu á deiliskipulagi lóðanna við Breiðargötu verði felld, hafi fyrirtækið HB Grandi engin áform um að hætta starfsemi á Akranesi. „Það er fjarri lagi að nokkuð slíkt hafi verið rætt í stjórn HB Granda,“ sagði Vilhjálmur.

 

Markmið um lágmörkun lyktarmengunar

Vilhjálmur fór einnig yfir hugmyndir um stækkun þurrkverksmiðju Laugafisks. Verkefninu verður skipt í tvo áfanga þar sem ákveðnum skilyrðum skal uppfyllt til að ráðist verði í annan áfangann. Í fyrri áfanganum verður byggð ný eftirþurrkun á lóð við Breiðargötu sem kemur í stað þeirrar starfsemi sem undanfarið hefur verið á Vesturgötu, þaðan sem mesta lyktarmengunin hefur borist. Í öðrum áfanga verksins er áformuð bygging færibandaþurrkunar og eftirþurrkunar á sama stað. Í fyrri áfanga verða afköst verksmiðjunnar aukin úr 170 tonnum á viku í 250-300 tonn. Þá strax yrði enginn flutningur með hálfunna vöru milli húsa. Vilhjálmur sagði einnig í svari við fyrirspurnum að ekkert verði af áformum um byggingu annars áfanga stækkunar Laugafisks ef ekki tekst að uppfylla markmið um að vinna bug á lyktarmengun. „Það er ekki markmið HB Granda að vera í andstöðu við íbúa, hvorki á Akranesi né annarsstaðar. Við höfum sett mjög metnaðarfull markmið um að draga úr þeirri lyktarmengun sem verið hefur af starfseminni og af þeim markmiðum verður enginn afsláttur gefinn,“ sagði Vilhjálmur. Hann fór einnig yfir mælingar sem gerðar hefur verið á lyktarmengun í nágrenni Laugafisks. Búið væri að þróa lyktarskynsaðferðir sem eiga að mæla lykt í mismunandi fjarlægð frá verksmiðjunni. „Markmiðið er að takmörkun um að koma í veg fyrir lyktarmengun verði náð innan við ári eftir að fyrsta áfanga stækkunar Laugafisks við Breiðargötu verði náð.“

 

Helstu breytingar

Á fundinum fór starfsmaður frá VSÓ yfir núverandi skipulag Breiðarsvæðisins frá 1998 og þær breytingar sem lagðar eru til að gerðar verði á því. Þær snúa meðal annars að fækkun lóða og lítilsháttar landfyllingu sunnan við núverandi hús Laugafisks. Gert er ráð fyrir að vegna framkvæmdanna þurfi um 4000 fermetra landfyllingu. Gísli ítrekaði að í tillögu að breytingu á skipulagi verði ekki farið í byggingu annars áfanga stækkunar Laugafisks nema tryggt hafi verið að markmið um grenndaráhrif af starfseminni verði náð, einkum hvað lykt snertir. Hámarkshæð bygginga samkvæmt skipulagstillögunni eru 13 metrar, en ekki gert ráð fyrir að byggingar verði svo háar.

 

Nýjung að sett séu markmið um lykt

Í fyrirspurnum eftir að framsöguerindi höfðu verið flutt var meðal annars spurt út í þær lyktarrannskóknir sem farið hafa fram. Hörður Ó Helgason dró í efa ágæti þeirra aðferða sem beitt hafi verið til að meta lyktarmengun. Sagði hann persónubundið hvernig fólk metur lykt, það sem einum þætti til dæmis fýla gæti öðrum þótt ilmur. Í svari við fyrirspurn Harðar benti Sigurður Páll Harðarson sviðsstjóri hjá Akraneskaupstað á að lagt væri til í skipulaginu að skipaður verði skynmatshópur óháðra aðila sem starfaði við símat á lyktarmengun frá starfsemi Laugafisks. Að meðaltali fengist þá haldbær aðferð til að meta lyktarmengun. Sagði hann þó að engin ein auðveld leið væri til að meta lykt. Hægt væri að styðjast við ákveðna lyktarstaðla, en svo þyrfti þefnæmi fólks til að staðsetja hvar á slíkum skala lykt væri. Það væri engu að síður nýtt hér á landi að sett væru markmið um lykt eins og gert er í skipulaginu.

 

Ingólfur Árnason benti á að eðlilegt væri að spyrja sérstaklega íbúa sem búa innan við 500 metra frá starfsemi fiskþurrkunar hvað þeim fyndist um framkvæmdina. Þeir ættu vissulega að hafa mest um það að segja hvort þeir sætti sig við þessi áform, fremur en þeir sem búa lengra frá. Regína bæjartjóri svaraði því til með þeim hætti að með auglýsingu á skipulagi væri verið að spyrja íbúa. Þeir gætu lagt fram athugasemdir sem bæjarstjórn þyrfti að svara áður en skipulagið verður samþykkt.

Sjónvarp Skessuhorns
Leit á vefnum
Fréttasafn
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Héðan og þaðan
Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is