Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
04. nóvember. 2005 02:26

Sýslumaður Akurnesinga efins um breytingar á skipan lögreglumála

Ólafur Þór Hauksson, sýslumaður og lögreglustjóri á Akranesi hefur tilteknar efasemdir um tillögur þær sem nú liggja fyrir um nýskipan lögreglumála en eins og fram hefur komið í Skessuhorni eru í tillögum nefndar um nýskipan lögreglumála lagðar til ákveðnar breytingar á starfsemi lögreglunnar á Vesturlandi og lagt er til að embættið í Borgarnesi verði eitt af sjö svokölluðum lykilembættum á landinu. Lykilembættunum verður falið að annast rannsókn og saksókn stærri og flóknari mála. Með því telur nefndin að möguleikar á sérhæfingu á hverjum og einum stað aukist auk þess sem rannsóknir mála verði efldar þar sem mjög vel þjálfaðir og reyndir rannsakarar munu sinna rannsóknum allra stærri og flóknari sakamála.

 

 

Í tillögum nefndarinnar er lagt til að starfræksla rannsóknardeildar verði hjá lykilembættinu í Borgarnesi og falli því fjárveiting vegna rannsóknarlögreglumann á Akranesi til embættisins í Borgarnesi.

 

Um nokkurt skeið hefur verið sólarhringsvakt hjá lögreglunni á Akranesi auk þess sem starfrækt hefur verið rannsóknardeild hjá embættinu frá árinu 1986. Hjá rannsóknardeildinni hefur starfað einn rannsóknarlögreglumaður og auk þess hafa tveir lögreglumenn úr almenna lögregluliðinu verið þjálfaðir til rannsóknarstarfa. Hafa þeir aðstoðað við rannsókn stærri og flóknari mála og leyst af rannsóknarlögreglumann í sumarleyfum.

 

Ólafur Þór segir að rannsóknardeildin á Akranesi hafi á undanförnum árum komið að rannsókn stórra og flókinna mála og sýnt í verki hæfni til að taka á slíkum málum. Tillögur þær sem nú liggja fyrir geri ráð fyrir að fjárveitingar vegna rannsóknarlögreglumanns á Akranesi færist til embættisins í Borgarnesi. Því sé í raun verið að leggja niður rannsóknardeildina á Akranesi og huga að uppbyggingu nýrrar deildar í Borgarnesi, þar sem sérstök rannsóknardeild hefur ekki verið til staðar áður.

 

Slíkar breytingar geti hugsanlega haft þau áhrif að mikilvæg þekking og reynsla tapist í kjölfarið. Hann telji því eðlilegt að þar sem þessi starfsemi er þegar til staðar á Akranesi komi til álita að það embætti verði gert að svokölluðu lykilembætti. Þá gæfist kostur að halda áfram þeirri uppbyggingu sem átt hefur sér stað á undanförnum árum. Hann telur einnig eðlilegt að horft verði til íbúafjölda. Á Akranesi búi flestir íbúar svæðisins og þar hljóti eðli málsins samkvæmt verkefnin að mestu að liggja. Þá vanti einnig í tillögur nefndarinnar útfærslu á fyrirhuguðum breytingum. Nefnir hann sérstaklega að með tillögum nefndarinnar sé í raun verið að leggja niður rannsóknardeildina á Akranesi en ekki komi fram með hvaða hætti að því verður staðið gagnvart þeim starfsmanni sem nú gegnir stöðu rannsóknarlögreglumanns.

 

Aðspurður hvort hann telji líklegt að tillögur þær sem nefndin lagði fram geti tekið breytingum segir Ólafur Þór erfitt segja. „Fram hefur komið að dómsmálaráðherra hafi í meginatriðum fallist á tillögur nefndarinnar en nánari útfærsla og framkvæmd þeirra verði ákveðin að lokinni kynningu um land allt þar sem kallað verði eftir sjónarmiðum heimamanna. Ég treysti því að með því að kanna sjónarmið sé verið að efna til rökræðna um tillögur nefndarinnar og í framhaldi af því verði tekið mið af umræðunni og þeim athugasemdum sem fram koma við endanlega ákvörðunartöku í málinu“ segir Ólafur Þór.

Sjónvarp Skessuhorns
Leit á vefnum
Fréttasafn
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is