Forsíða
Auglýsing
Rss straumur af fréttum frá Skessuhorni
Lágnætti. Fjórði Þórsdagur í Haustmánuði
Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
31. janúar. 2006 09:46

Forseti Íslands heimsækir Grundaskóla

Forseti Íslands hr. Ólafur Ragnar Grímsson og eiginkona hans frú Dorrit Moussaieff komu í opinbera heimsókn í Grundaskóla á Akranesi í dag. Með heimsókninni vildu þau kynna sér starfsemi skólans, sem á síðasta ári hlaut fyrstur skóla Íslensku menntaverðlaunin. Í fylgdarliði forsetahjónanna var dómnefnd Íslensku menntaverðlaunanna auk fulltrúa frá Sparisjóðunum sem er helsti styrktaraðili verðlaunanna.

Við komu gestanna til skólans léku tónlistarnemar harmonikkutónlist. Stutt afhöfn var að því loknu við verðlaunastein þann er skólinn fékk að gjöf er Íslensku menntaverðlaunin voru afhent. Við athöfnina bauð Guðbjartur Hannesson gesti velkomna.

 

Að því loknu gengu gestir um skólann og heimsóttu bekkjardeildir. Þá skemmtu nemendur á unglingastigi gestum með söng og hljóðfæraleik.

Þegar skoðunarferð um skólann lauk hófst hátíðarsamkoma á sal skólans sem Hrönn Ríkarðsdóttir stýrði. Auk gesta voru yngri bekkir skólans viðstaddir samkomuna.  Þar fluttu stutt ávörp Guðbjartur Hannesson skólastjóri og formaður nemendafélagsins Ragnar Þór Gunnarsson ávarpaði gesti. Elísabet Traustadóttir sem nýverið sigraði í hæfileikakeppni grunnskólanna á Akranesi söng eitt lag og Fiðlusveit Tónlistarskólans lék nokkur lög.

 

Spurt um svefntíma og gæludýr

Þá flutti forsetinn ávarp. Hann lýsti yfir mikilli ánægju sinni með heimsóknina og sagði gesti hafa kynnst því mikla og góða starfi sem unnið væri frá degi til dags í Grundaskóla. Hann ræddi áhyggjur manna af framtíð æskunnar og þeir sem efuðust um hana gætu farið í Grundaskóla og komist að því gagnstæða. Að ávarpinu loknu svaraði forsetinn spurningum nemenda. Margir báru fram spurningar sem forsetinn svaraði samviskusamlega. Bar þar margt á góma. Meðal annars var spurt um áhugamál hans, hvenær forseti færi að sofa, hvernig hefðbundinn dagur í hans lífi væri, um launakjör og fleira. Einn nemandi vildi vita hvort forsetahjónin ættu gæludýr og svaraði forsetinn að svo væri ekki. Gat hann þess að umræða hefði verið á hans heimili um slíkt en ekki væri víst hvort þau hjón fengju sér hund eða hænur. Bað hann nemendur um að greiða atkvæði um hvora dýrategundina ætti að velja og var yfirgnæfandi hluti nemenda hlynntur því að forsetinn fengi sér hund sem gæludýr.

Þá upplýsti forsetinn að hann hefði frá því í æsku á Ísafirði haldið með liði ÍA í knattspyrnu og féll það nemendum sérlega vel í geð. Nemendur skólans fluttu því næst brot úr söngleiknum Hunangsflugur og villikettir. Að því loknu voru forsetahjónunum færðar gjafir frá skólanum og einnig færði Gísli Kjartansson sparisjóðsstjóri SPM nemendafélaginu bókagjöf.

Um hádegisbil héldu gestirnir í Íþróttamiðstöðina og kynntu sér starfsemi hennar. Að því loknu var hádegisverður í íþróttamiðstöðinni í boði bæjarstjórnar Akraness.

 

Í Skessuhorni sem kemur út á morgun verður fjöldi mynda frá heimsókn forsetahjónanna á Akranes.

 

Sjónvarp Skessuhorns
Leit á vefnum
Fréttasafn
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is