Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
07. apríl. 2006 02:11

Verkefni dagsins að vinna bug á þreytu og sigurvímu

Þjálfari Skallagríms í körfuknattleik segir það verkefni næsta sólarhrings að vinna bug á þreytu og sigurvímu liðsins áður en úrslitaviðureignin gegn Njarðvík hefst. Hann segir enga ástæðu til að óttast lið Njarðvíkur frekar en önnur lið sem leikmenn Skallagríms hafa lagt að velli. Í gærkvöld vann lið Skallagríms lið Keflavíkur í fimmta leik liðanna í undanúrslitum Íslandsmótsins í körfuknattleik og munu því leika til úrslita um titilinn eftirsótta við Njarðvík. Áður höfðu Skallagrímsmenn slegið Grindvíkinga út í úrslitakeppninni. Reykjanes hefur á undanförnum árum verið vígi körfuboltans á landinu. Má í því sambandi nefna að undanfarin 22 ár hefur liði utan Reykjaness aðeins tvisvar tekist að vinna titilinn. Í bæði skiptin voru það KR-ingar sem unnu það afrek. 

 

Með frammistöðu sinni má því segja að leikmenn Skallagríms séu langt komnir með að sigra það mikla vígi sem Reykjanes er. Þótt bjartsýni sé fylgifiskur allra íþróttaáhugamanna má fullyrða að ekki hafi margir leyft sér að vona að lið Skallagríms næði þeim árangri sem nú er raunin. Slíkt á þó ekki við um leikmennina sjálfa. Á heimasíðu félagsins var tekið stutt viðtal við nokkra leikmenn í upphafi tímabilsins. Fimm þeirra spáðu því að liðið myndi leika til úrslita um titilinn og af þeim spáðu tveir því að úrslitaviðureignin yrði gegn Njarðvík. 

 

Valur Ingimundarson þjálfari Skallagríms segir sigurinn í gær hafa verið mjög sætan. „Þetta var sigur samtillts liðs sem hafði að baki sér mjög sterkan hóp stuðningsmanna. Þegar allt slíkt leggst á eitt vinnast sigrar eins og í gærkvöldi“. Sem kunnugt er unnu Keflvíkingar þriðja leik félaganna með 50 stiga mun. Aðspurður hvernig hægt sé að rífa lið upp eftir slíkan tapleik og stýra þeim til tveggja sigurleikja segir Valur það ekki mikið mál þegar liðið sé skipað jafn sterkum einstaklingum og raun ber vitni. „Við létum þetta stóra tap einfaldlega ekki hafa áhrif á okkur. Við gleymdum því um leið og leikurinn var búinn og fórum að hugsa um næsta leik“.

 

Fyrsti leikurinn í úrslitaviðureigninni gegn Njarðvík hefst í Njarðvík á morgun kl. 16. Liðsmenn Skallagríms fá því stuttan tíma til hvíldar en síðasti leikur Njarðvíkinga var á mánudagskvöldið. Valur segist auðvitað hafa kosið lengri hvíld en við því sé ekkert að gera svona sé boltinn og því dugi ekkert væl. Aðspurður um möguleikana gegn Njarðvík vill Valur lítið tjá sig. „Við tökum þessari viðureign eins og öðrum viðureignum en ég minni á að við höfum þegar lagt að velli Grindvíkinga og Keflvíkinga. Því er engin ástæða til annars en að bera höfuðið hátt. Við förum í þessa leiki eins og aðra leiki okkar með sigurinn að leiðarljósi“.

 

Valur er sem kunnugt er einn sigursælasti leikmaður og þjálfari landsins og lék lengstum með Njarðvík. Aðspurður hvort ekki verði undarlegt að berjast við sitt gamla lið segir hann svo ekki vera. „Þrátt fyrir að Suðurnesjamenn séu erfiðir heim að sækja voru leikirnir gegn Keflavík mjög drengilegir og ég hef enga ástæðu til að ætla annað en að sama verði uppá teningnum gegn Njarðvík“.

 

Dimitar Karadzovski leikmaður Skallagríms hefur glímt við meiðsli en hefur samt sem áður leikið með liðinu. Aðrir leikmenn liðsins eru heilir að sögn Vals. Aðspurður hvernig undirbúningi liðsins fyrir laugardaginn verður háttað segir Valur hann felast í hvíld. „Við munum einungis hvílast og okkar sameiginlega verkefni verður að vinna bug á þreytu og sigurvímu eftir leikinn í gærkvöldi. Takist það þarf engu að kvíða því ég veit að stuðningsmenn okkar munu standa dyggilega við bakið á okkur“.

 

Sjónvarp Skessuhorns
Leit á vefnum
Fréttasafn
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is