Lögregluliðin á suðvesturhorninu hafa staðið að sameiginlegu átaki sem miðar af því að koma í veg fyrir umferðarlagabrot og þá hættu sem þeim fylgir.  Lögreglan á Akranesi sinnti um hundrað verkefnum í liðinni viku og þar af voru 47 sem sneru að umferðareftirliti. Fjórtán ökumenn voru kærðir fyrir of hraðan akstur og mældist sá sem hraðast ók á 130 km/klst. hraða þar sem hámarkshraði er 90 km./klst. Fjórir umráðamenn vörubifreiða voru kærðir fyrir að leggja bílum sínum inn í íbúðarhverfum sem er með öllu bannað. Þá eiga tíu ökumenn von á sektum fyrir að nota ekki öryggisbelti og aðrir fimm voru kærðir fyrir að tala í farsíma við akstur án þess að nota handfrjálsan búnað eins og skylda er.