Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
08. júní. 2006 03:53

Glæfraakstur með gröfu stofnaði fjölda vegfarenda í stórhættu

Glæfraakstur bílstjóra flutningabíls skapaði mikla slysahættu við Hvalfjarðargöngin í gærkvöldi er grafa á flutningabílnum skall á stálbita í opi ganganna. Glussi sprautaðist yfir bíla og akbraut og varð að loka göngunum um hríð svo unnt væri að fjarlægja stálbitann, flutningabílinn og gröfuna. Frá þessu segir á vef Spalar.

 

Flutningabíllinn var á leið úr Kópavogi upp í Borgarfjörð og gröfuarmurinn skagaði heila 4,95 metra upp í loftið en lög mæla fyrir um 4,2 metra hámarkshæð farms. Í ríflega 100 metra fjarlægð frá munnum ganganna eru hæðarslár yfir akbrautum sem bílstjórar geta miðað hæð farms við áður en kemur að sjálfum göngunum. Myndir úr öryggiskerfi Hvalfjarðarganga sýna að bílstjórinn hægði ekki einu sinni á sér við öryggisslárnar heldur ók hiklaust á þær og áfram þar til grafan skall á stálbitanum sem er þvert yfir gangaopið í rúmlega 4.2 metra hæð. Höggið var svo mikið að stálbitinn kengbognaði en hékk samt uppi.  Glussaslöngur í gröfuarminum fóru í sundur og glussi sprautaðist á bílana sem næstir komu og yfir sjálfar akbrautirnar. Við það urðu brautirnar hálar og  slysahætta jókst þar með enn frekar. Flutningabíllinn sat fastur og loka varð göngunum um hríð svo unnt væri að taka stálbitann niður og fjarlægja síðan bæði bíl og gröfu.

 

Á vef Spalar segir að atburðarásin, eins og hún birtist á myndbandi úr öryggismyndavélum, sé hrollvekjandi. Þá segir að við blasi að ef stjórnendur flutningabíla virða ekki landslög um hæð farms - allir sem einn - sé spurningin ekki hvort, heldur hvenær, verður alvarlegt slys í Hvalfjarðargöngum af þessum ástæðum.


„Ef flutningabíllinn hefði haldið áfram för sinni í gærkvöld, eftir áreksturinn við öryggisbitann, hefði grafan næst lent á blásarasamstæðunum í lofti ganganna og stórskemmt þær eða slitið niður í versta falli. Stálbitunum í gangamunnunum er einmitt ætlað að verja blásarana og annan tækni- og öryggisbúnað í loftinu og ekki að ástæðulausu að þeir voru settir upp, eins og dæmin sanna“ segir orðrétt á vefnum.  


„Það þarf ekki að fara mörgum orðum um hættuna sem skapast fyrir aðra vegfarendur þegar flutningabílstjórar leyfa sér að brjóta lög og storka örlögunum með því að reyna að þjösnast undir Hvalfjörð með farm sem er himinhátt yfir leyfilegum mörkum. Mikil umferð var um göngin þegar grafan skall á stálbitanum í gærkvöld og menn geta hæglega ímyndað sér afleiðingarnar ef til dæmis ,,sætin", sem  stálbitinn situr í til beggja enda, hefðu losnað og dottið niður á akbrautina. Hvað þá ef bitinn sjálfur hefði dottið niður. Hann er stálstykki upp á hálft tonn! Það gerist því miður ótrúlega oft að farmur rekst upp í hæðarslár Hvalfjarðarganga en tilvikið í gærkvöld er með þeim grófari. Auðvitað sætir undrun að atvinnubílstjórar skuli ítrekað leika sér að eldinum og stofna lífi og limum vegfarenda í stórhættu með slíku ábyrgðarleysi.

Spölur hefur af gefnu tilefni vakið athygli lögreglu og stjórnvalda á alvöru málsins enda ætlast félagið til þess að lög um hámarkshæð farms séu virt í Hvalfjarðargöngum engu síður en lög um hámarkshraða.  Viðurlög við brotum á lögum og reglum um hæð farms virðast þar að auki vera vægari en gerist og gengur erlendis“ segir að lokum á vef Spalar.

Sjónvarp Skessuhorns
Leit á vefnum
Fréttasafn
Næsta ár Fyrra ár
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Héðan og þaðan
Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is