Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
19. júní. 2006 11:58

Fjárfesting fyrir nærri fimm milljarða á Bifröst

Háskólastjórn Viðskiptaháskólans á Bifröst hefur kynnt tillögur að breytingum í starfi skólans. Þær fela meðal annars í sér fjárfestingu fyrir nærri fimm milljarða króna. Meðal breytinganna er bygging grunnskóla á staðnum sem verði einkavæddur. Þá eru hugmyndir uppi um útrás skólans. Kostnaður sveitarfélagsins er áætlaður 1,4 milljarðar króna. Þessi kostnaðarsama uppbygging kom ekki til tals fyrir sveitarstjórnarkosningarnar í vor og á þessa miklu uppbyggingu er ekki minnst í málefnasamningi flokkanna sem fara með meirihluta í sveitarfélaginu. Eins og fram kom í Skessuhorni nýlega kynnti háskólastjórn Viðskiptaháskólans á Bifröst tillögur að breytingum í starfi skólans á næstu árum.

 

Vegna nokkurra óska þar um birtum við hér á skessuhorn.is  í heild sinni viðtal við Runólf Ágústsson, rektor og Pál S Brynjarsson, bæjarstjóra í Borgarbyggð sem var í prentútgáfu Skessuhorns í liðinni viku:

 

Helstu breytingar:

Helstu markmið með breytingunum eru að auka sérstöðu skólans, auka tekjur hans, bæta nýtingu fjárfestinga og stjórnsýslu, auka gæði í námi og kennslu og auka gæði og vöxt í rannsóknar- og ráðgjafarstarfsemi.

Með tillögunum er ætlunin að fjölga nemendum í 1.200-1.400 og af þeim verði 900-1.000 þeirra búsettir á Bifröst. Á staðnum verði byggt upp staðbundið meistaranám í viðskipta- og félagsvísindadeild auk doktorsnáms í öllum deildum. Þá verði deildir skólans þróaðar frekar þannig að viðskiptadeildin þróist í átt til hágæða viðskiptaháskóla, lagadeildin verði sú öflugasta hér á landi og „skili lögfræðingum með praktíska þekkingu sem eru gjaldgengir á alþjóðlegan markað,“ eins og segir orðrétt í kynningu skólans.

 

Fjórða stoðin

Þá er stefnt að því að skjóta fjórðu stoðinni undir starfsemi skólans í formi kennaraskóla „sem byggður verði upp í tengslum við uppbyggingu grunnskóla og einkarekins leikskóla í háskólaþorpinu,“ segir í kynningu. Kennaradeildinni er ætlað að sinna kennslu til B.Ed. gráðu bæði fyrir leik- og grunnskólakennara. Reiknað er með að núverandi leik- og grunnskóli verði yfirteknir frá sveitarfélaginu, einkavæddir og reknir sem hluti af kennaraskólanum sem æfingadeildir. Þessari skipulagsbreytingu í rekstrinum er meðal annars ætlað að bæta „verulega gæði leik- og grunnskóla á svæðinu sem skiptir miklu máli,“ segir í kynningu skólans.

 

Uppbygging húsnæðis 

Nái tillögurnar fram að ganga kalla þær á verulega uppbyggingu húsnæðis á Bifröst. Meðal annars er gert ráð fyrir byggingu nýs skólahúss sem meðal annars hýsi fjóra ráðstefnu- og fyrirlestrasali sem rúmi um 370 manns auk 10 vinnuherbergja sem hýsi hvert um sig 15 manns. Einnig er gert ráð fyrir 10 skrifstofum fyrir kennara í húsinu. 

Þá er gert ráð fyrir bygginu upplýsingamiðstöðvar sem hýsi bókasafn, tölvuþjónustu, um þrjátíu kennslustofur og vinnubása fyrir um 100 manns. Þá er reiknað með byggingu fyrir kennaradeildina sem hýsi skrifstofur stjórnenda og kennara auk vinnu- og æfingaaðstöðu fyrir nemendur.

 

Uppbygging samfélagsþjónustu 

Verði hugmyndir þessar að veruleika með þessari miklu fjölgun nemenda sem búsettir verða á Bifröst kallar það á mikla uppbygginu í samfélaginu á staðnum. Reiknað er með byggingu um 80 fjölskylduíbúða og 170 einstaklingsíbúða. Einnig þarf að huga að uppbyggingu í heilsugæslu, löggæslu, brunavarna, sorphirðu, verslun og þjónustu, kirkju, leikskóla, grunnskóla, fjölnota íþróttahúss, íþróttavallar, sundlaugar og öllu öðru er samfélag af þessari stærð krefst. Í þessum nýju hugmyndum felst að í raun verði starfandi fjórir sjálfstæðir skólar á Bifröst sem starfi undir stjórn deildarforseta í ábyrgð rektors.

 

Fjárfestingar á næstu fjórum árum

Eins og áður kom fram er reiknað með að fjárfest verði fyrir um ríflega 4,7 milljarða króna á árunum 2006-2009. Hlutur skólans er rúmir 3,3 milljarðar króna og þar af er bygging hótels fyrir um 750 milljónir króna. Þáttur sveitarfélagsins Borgarbyggðar í fjárfestingum er rúmlega 1,4 milljarður króna sem skiptist þannig að til byggingar  grunnskóla verði varið 550 milljónum króna, til leikskóla verði varið 210 milljónum króna og bygging íþróttasvæðis kosti um 650 milljónir króna.

 

Bestur innanlands og útrás erlendis 

Í hugmyndum háskólastjórnarinnar segir að á Bifröst verði rekinn lítill, góður og dýr háskóli sem verði sá besti hérlendis á sínum sviðum bæði hvað varðar kennslu, rannsóknir og þjónustu. Þá verði hann einnig samkeppnishæfur við góða einkarekna háskóla erlendis. Þá er einnig nefnt að skoðuð verði kaup á eða stofnsettur háskóli erlendis.

 

Hálft tónlistarhús 

Framkvæmdir sem nauðsynlegt er að ráðist verði í eru mjög stórar á íslenskan mælikvarða að ekki sé minnst á borgfirskan mælikvarða. Til að setja framkvæmdirnar í þekkt samhengi má nefna að kostnaðurinn er álíka og helmingur þeirra framkvæmda sem fyrirhugaðar eru vegna byggingar tónlistarhúss í Reykjavík. Hið nýja sameinaða sveitarfélag í Borgarfirði þarf ef af verður að fjárfesta fyrir um 1,4 milljarð króna. Á undanförnum árum hafa sveitarfélögin fjögur sem mynduðu hið nýja sveitarfélag varið um 150 milljónum króna í fjárfestingar á ári. Þarna er því um að ræða nærri 10 ára fjárfestingargetu sem ráðast þarf í á aðeins fjórum árum.

 

Einstakt tækifæri 

Runólfur Ágústsson, rektur Viðskiptaháskólans á Bifröst segir að vinna við þessa nýju stefnumótun hafi hafist á vettvangi háskólaráðs í janúar og eins og áður kom fram voru hugmyndirnar kynntar í lok maí eða nokkrum dögum eftir sveitarstjórnarkosningar. Aðspurður hvort ekki hefði verið eðlilegra að kynna tillögurnar fyrr þannig að frambjóðendum og íbúum hefði gefist kostur á að segja álit sitt á þeim sagði Runólfur að allt hefði sinn tíma og ekki hefði tekist að ljúka þessari stefnumótunarvinnu fyrr. Hann segir að þarna sé um að ræða einstakt tækifæri fyrir sveitarfélagið takist að hrinda þessum hugmyndum í framkvæmd. Ætlunin sé að byggja upp alþjóðlegan háskóla í fremstu röð á Bifröst og í framhaldinu verði Borgarfjörður helsta vaxtarsvæði landsins. Nú séu ákveðnar blikur á lofti í efnahagslífi landsmanna og samdráttur gæti verið framundan en það eigi ekki við um Borgarfjörð nái þessar hugmyndir að verða að veruleika.

 

Einkarekinn grunnskóli

Í aðdragana sveitarstjórnarkosninganna í Borgarfirði urðu töluverðar deilur um samning við Hjallastefnuna um rekstur leikskólans á Bifröst. Í stefnumótunni nú er gert ráð fyrir að nýr grunnskóli og leikskólinn verði einkareknir í samstarfi við háskólann. Runólfur segist ekki hafa áhyggjur af því að þessar einkavæðingarhugmyndir mæti mikilli andstöðu því þarna sé rætt um að byggja upp bestu skóla á öllum sviðum.

Nú þegar er kennaranám við tvo háskóla á Íslandi. Aðspurður hvort nauðsynlegt sé að bjóða fram þriðja háskólann í kennaranámi bendir Runólfur á að kennaranám á Íslandi sé einsleitt og því breytingar nauðsynlegar í þeim efnum. Hann segir kannanir sýna að aðeins tveir af hverjum fimm nemum sem ljúka kennaranámi haldi til hefðbundinna kennslustarfa. Stór hluti hinna halda til starfa í einkageiranum þar sem þeir mæti síauknum kröfum atvinnulífsins til endurmenntunar starfsmanna. Þeim þætti þurfi að sinna mun betur en þegar er gert. 

 

Góðar viðtökur stjórnmálamanna 

Runólfur segir hugmyndirnar hafa fengið góðar viðtökur hjá ráðuneyti menntamála, sveitarstjórnarmönnum og hjá fjárfestum. Endanleg ákvörðun um að leggja í uppbygginguna liggi hinsvegar ekki fyrir. Óskað hafi verið eftir svörum frá sveitarstjórn í þessum mánuði því verkið þurfi að vinnast hratt. Aðspurður hvort hægt sé að ætlast til svo skjótra svara frá sveitarstjórn segir hann svo vera. Til séu tvær tegundir stjórnmálamanna. Annars vegar umræðustjórnmálamenn og hins vegar aðgerðastjórnmálamenn. Hann trúi að framkvæmdastjórnmálamenn séu fleiri í Borgarfirði enda séu þessar hugmyndir unnar á hraða atvinnulífsins og því þurfi sveitarstjórnarmenn að vinna á þeim hraða líka. „Tækifærin blasa við okkur og þessar tillögur opna marga glugga. Þeir eru hins vegar fljótir að lokast klófesti menn ekki tækifærin.“

 

Ráðgjafafyrirtæki kallað til aðstoðar sveitarstjórn 

Páll Brynjarsson verðandi sveitarstjóri sameinaðs sveitarfélags í Borgarfirði segir tillögur Bifrestinga til skoðunar og ráðgjafafyrirtækið KPMG hafi verið ráðið til þess að aðstoða sveitarstjórn við stöðumat málsins. Hann segir sveitarstjórnarmenn hafa vitað af stefnumótun háskólans á Bifröst þrátt fyrir að endanlegar tillögur hafi ekki legið fyrir fyrr en að loknum kosningum. Hann segir að verði þessar hugmyndir að veruleika kalli þær á miklar breytingar í samfélaginu. Trúlega leggist starfsemi grunnskólans á Varmalandi af í kjölfarið. Hann segir að í þriggja ára framkvæmdaáætlun hafi sveitarstjórn Borgarbyggðar reiknað með töluverðri uppbyggingu í skólastarfi á Varmalandi þannig að þegar hafi verið gert ráð fyrir töluverðum fjármunum til uppbyggingar skólastarfs. Hann segir stefnt að því að svar sveitarstjórnar liggi fyrir sem allra fyrst en segist þó ekki viss um að það taki jafn skamman tíma og Bifrestingar óska eftir. Þessa dagana fari fram sveitarstjórnarskipti og það hafi óhjákvæmilega seinkun í för með sér. Hann bendir einnig á að nokkur umbrot hafi verið í ríkisstjórn og óttast að það hægi einnig á málum. Hann segir þó stefnt að því að niðurstaða sveitarstjórnar liggi fyrir fljótlega enda hafi sveitarstjónarmenn tekið málinu með opnum huga. „Þetta er gríðarleg fjárfesting fyrir sveitarfélagið en hér hefur verið mikil uppbygging að undanförnu sem fljótlega mun skila okkur auknum tekjum. Það mun einnig gerast takist að koma þessum hugmyndum í framkvæmd,“ segir Páll að lokum.

Sjónvarp Skessuhorns
Leit á vefnum
Fréttasafn
Næsta ár Fyrra ár
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Héðan og þaðan
Grundarfjarðarbær

Matarklasi - stofnfundur 23. janúar

Grundarfjarðarbær

Sorphirða

Grundarfjarðarbær

Aðalskipulag Grundarfjarðar - tillaga

Grundarfjarðarbær

Hunda- og kattahreinsun

Dalabyggð

Sælingsdalslaug lokuð

Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is