09. ágúst. 2006 01:37
Félagsmálaráðuneytið hefur kveðið upp úrskurð í kæru Blikkverks sf. Og Gísla Stefáns Jónssonar ehf. á hendur Akraneskaupstað. Kæran snéri að vilyrði fyrir úhlutun lóðar við Smiðjuvelli 17 sem Akraneskaupstaður veitti Bílási ehf. Kærendur höfðu sótt um lóðina og kröfðust þess að ákvörðun bæjarins væri úrskurðuð ólögmæt og felld úr gildi.
Kærendur fundu það helst að málsmeðferð bæjaryfirvalda að samið var við Bílás um úthlutun lóðarinnar án undangenginnar auglýsingar og þannig hafi jafnræðisregla stjórnarskrárinnar verið brotin, enda hafi bæjaryfirvöldum átt að vera kunnugt um áhuga þeirra á lóðinni. Þá telja þeir m.a. að vinnureglur Akraneskaupstaðar um úthlutun lóða hafi verið brotnar.
Félagsmálaráðuneytið fellst ekki á þessi sjónarmið og úrskurðar að ákvörðun bæjaryfirvalda skuli standa óhögguð.
Ráðuneytið fellst á þær skýringar Akraneskaupstaðar að Bílás ehf. hafi þegar ákvörðunin var tekin staðið framar kærendum með tilliti til þáverandi húsnæðisaðstæðna og fyrri umsókna. Auk þess telur ráðuneytið að bæjaryfirvöld hafi heimild til að víkja frá reglum um auglýsingar lóða, enda kveði grein 3.4 í úthlutunarreglum Akraneskaupstaðar á um að bæjarráði sé í sérstökum tilvikum heimilt að veita vilyrði fyrir lóðum án auglýsinga þegar sótt er um lóðir innan skipulagðra svæða eða á óskipulögðum svæðum.
Félagsmálaráðuneytið beinir því þó til bæjaryfirvalda að skýra reglur hvað varðar þessa undantekningu á þeirri meginreglu að auglýsa lóðir. Ráðuneytið telur að regla 3.4 sé ekki nógu skýr og gagnsæ svo borgararnir geti treyst því að ákvarðanir sem teknar séu á grundvelli hennar séu byggðar á málefnalegum sjónarmiðum og telur að í henni verði að vera leiðbeiningarsjónarmið um hvenær teljist rétt að beita henni.