07. desember. 2006 09:02
Þrír þingmenn Vinstri-grænna, Jón Bjarnason, Þuríður Backman og Ögmundur Jónasson, hafa lagt fram á Alþingi tillögu til þingsályktunar um átak í uppbyggingu héraðsvega. Er þar lagt til að samgönguráðherra verði falið að hrinda í framkvæmd sérstöku átaki í viðhaldi og uppbyggingu héraðsvega sem flokkast samkvæmt vegalögum oftast undir safn- og tengivegi. Sérstaklega skuli hugað að lagningu bundins slitlags á þessa vegi.
Til verksins verði varið að minnsta kosti fjórum milljörðum króna sem dreifist jafnt á næstu fimm ár. Komi sú fjárveiting til viðbótar þeim fjármunum sem ætlaðir eru þessum vegaflokkum í samgönguáætlun.
Þá leggja þingmennirnir til að ráðherra skipi þriggja manna nefnd er kanni hvernig breyta megi skilgreiningum og einfalda þær, sem og flokkun vega eftir tegundum í vegalögum og verkaskiptingu ríkis og sveitarfélaga að teknu tilliti til breyttra þarfa og aukinna krafna sem gerðar eru til þessara vega. Nefndin skili áliti sínu fyrir 1. febrúar 2007.
Eins og fram kom í fréttum Skessuhorns fyrir nokkrum vikum eru aðeins tæplega 9% tengi- og safnvega í Norðvesturkjördæmi lagðir bundnu slitlagi og eru íbúar kjördæmisins langverst settir hvað þetta hlutfall varðar.