20. desember. 2006 10:40
Íbúar í Skorradalshreppi og Helgafellssveit greiða á næsta ári lægsta útsvar sem lög leyfa eða 11,24%. Þetta kemur fram í tilkynningu fjármálaráðuneytisins um staðgreiðslu opinberra gjalda á næsta ári. Sveitarfélög hafa heimild til að ákvarða útsvar á bilinu 11,24% til 13,03%. Af 79 sveitarfélögum ætla 61 þeirra að innheimta hámarksútsvar en 3 þeirra innheimta lágmarksútsvar. Meðalálagning útsvars á næsta ári verður 12,97%.
Af tíu sveitarfélögum á Vesturlandi innheimta sex þeirra hámarksútsvar, Akraneskaupstaður, Borgarbyggð, Grundarfjarðarbær, Stykkishólmsbær, Snæfellsbær og Dalabyggð. Eyja- og Miklaholtshreppur innheimtir 12,80% og Hvalfjarðarsveit innheimtir 11,61%.
Ef álagning útsvars er sett í annað tölulegt samhengi má nefna að hjón með 5 milljóna króna tekjur greiða rúmar 651 þúsund krónur í útsvar þar sem það er hæst en 562 þúsund krónur þar sem það er lægst. Munurinn er tæpar 90 þúsund krónur á ári eða tæpar 7.500 krónur á mánuði.