Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
15. janúar. 2007 02:16

Samið um fyrstu skrefin að tvöföldun á Kjalarnesi og undir Hvalfirði

Fulltrúar Spalar ehf., sem á og rekur Hvalfjarðargöng,  og Vegagerðarinnar hafa undirritað samkomulag sem líta verður á sem fyrsta formlega skrefið að því marki að tvöfalda þjóðveginn um Kjalarnes og gera ný göng undir Hvalfjörð. Í þessu samkomulagi er kveðið á um að Spölur og Vegagerðin séu sammála um nauðsyn framkvæmda við hringveginn á Kjalarnesi og við Hvalfjarðargöng til að auka afköst umferðarmannvirkjanna og auka jafnframt umferðaröryggi. Til grundvallar í viðræðum aðila var að tvöfalda veginn úr Kollafirði að Hvalfjarðargöngum og tvöfalda göngin. 

 

Gísli Gíslason, stjórnarformaður Spalar segir að aðdragandi samkomulagsins hafi í stórum dráttum verið sá að forystumenn Spalar kynntu Sturlu Böðvarssyni samgönguráðherra fyrr í vetur áhuga sinn og  hugmyndir um hvernig koma mætti undirbúningi nýrra Hvalfjarðarganga og vegabótum á Kjalarnesi á dagskrá þegar á árinu 2007. Samgönguráðherra fól Vegagerðinni í framhaldinu að taka upp viðræður við Spöl og nýja samkomulagið er afrakstur þeirra viðræðna.

 

250 milljónir króna til ráðstöfunar

Samið var um það á sínum tíma að Vegagerðin lánaði Speli  fjármuni til að félagið gæti greitt hluthöfum sínum samningsbundinn arð. Þetta fyrirkomulag var við lýði um árabil eftir að félagið var stofnað. Skuld Spalar af þessu tilefni er um 150 milljónir króna og í nýja samkomulaginu er kveðið á um að félagið geri að fullu upp við Vegagerðina í september 2007. Ennfremur segir þar að þessum fjármunum skuli varið til undirbúnings framkvæmda við að tvöfalda þjóðveginn á Kjalarnesi og tvöfalda Hvalfjarðargöng, til dæmis vegna skipulagsmála, mats á umhverfisáhrifum, nauðsynlegra landakaupa og hönnunar á nýjum vegi.  Vegagerðin leggur til viðbótar fram að minnsta kosti 100 milljónir króna á árunum 2007 og 2008 til að nota í sama skyni. Alls verða því að minnsta kosti 250 milljónir króna til ráðstöfunar. Spölur og Vegagerðin ætla að setja á laggir sérstaka samstarfsnefnd vegna undirbúningsverkefnanna til að fjalla um tilhögun þeirra og framgang.

 

Stjórnarformaður Spalar fagnar samkomulaginu

Gísli fagnar samkomulaginu við Vegagerðina enda hafi Spalarmenn hvatt ítrekað til þess að horft sé á Sundabraut, tvöföldun vegar um Kjalarnes og stækkun Hvalfjarðarganga sem eina framkvæmd sem skipta mætti svo eftir atvikum í einstaka þætti. Þeir hafi bent á að umferð aukist stöðugt um Hvalfjarðargöng og nauðsynlegt sé að taka tvöföldun ganganna á dagskrá nú þegar til að auka afköst þeirra og tryggja áfram öryggi vegfarenda.

,,Samkomulag Spalar og Vegagerðarinnar setur stækkun ganganna í raun og veru á dagskrá og tvöföldun á Kjalarnesi sömuleiðis. Orð eru til alls fyrst og nú verður þeim fylgt eftir með fyrstu skrefunum til undirbúnings," segir Gísli. ,,Vissulega tekur sinn tíma að hanna ný jarðgöng, ganga frá nauðsynlegum breytingum á skipulagi, meta umhverfisáhrif framkvæmdanna, kaupa land og gera annað það sem gera þarf. Mikilvægast er samt að nú er ferlið formlega hafið. Tvöföldun þjóðvegarins á Kjalarnesi og tvöföldun Hvalfjarðarganga er besta ráðstöfunin sem í boði er til að tryggja öryggi vegfarenda á sama tíma og umferð eykst þar ár frá ári. Þessa sýn tel ég að samgönguráðherra, Vegagerðin og Spölur eigi sameiginlega og það staðfestist í raun með samkomulaginu. Ég vænti þess fyrir hönd Spalar að undirbúningurinn fái greiðan framgang og sjálfar framkvæmdirnar komist á dagskrá sem fyrst. Veruleikinn kallar á þessar samgöngubætur.“

Sjónvarp Skessuhorns
Leit á vefnum
Fréttasafn
Næsta ár Fyrra ár
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Héðan og þaðan
Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is