Rannsóknarmiðstöð Háskólans á Bifröst hefur tekið að sér að gera þjónustukönnun fyrir Hvalfjarðarsveit og sjá um úrvinnslu á niðurstöðum. Hringt verður á hvert heimili í sveitarfélaginu og eru úthringingar hafnar. Vonast er til að könnunin gefi sem skýrasta mynd af því hvaða þjónustu íbúar nýta sér og hvar. Meðal þess sem spurt verður út í er ástundun íþrótta, tónlistarnám, félagsstarf fyrir eldri borgara, heimsóknir og notkun bókasafna og/eða annarra safna og ástundun barna og unglinga í félagsmiðstöðvum. Þá verða allir íbúar 18 ára og eldri spurðir um hvaða þjónustu þeir sækja til annarra sveitarfélaga og foreldrar og forráðamenn verða spurðir sömu spurningar fyrir hönd barna sinna.