27. júní. 2007 04:21
Nú stendur yfir sýningin “Complet færdige Huse” í Norska húsinu í Stykkishólmi. Sýningin er um verksmiðjuframleiðslu á húsum og byggingarhlutum hjá Strømmen Trævarefabrik í Svíþjóð. Sýningin var sett upp af Akershus Fylksmuseum, Oslo Bymuseum og Fortidsminneforeningen í Oslo og Akershus árið 2003. Hún stendur yfir til 22. júlí nk. en þann 28. júlí verður önnur sýning opnuð í húsinu þar sem sýndir verða handprjónaðir vettlingar og þjóðbúningar ásamt aukahlutum sem tengjast þeim. Einnig verður sýning á Teneriff, sem er aðferð sem líkist vefnaði og aðallega er notuð við borðdúkaframleiðslu. Einnig verða sýndir ýmsir munir úr hekli.
Aldís Sigurðardóttir, forstöðumaður Byggðasafns Snæfellinga og Hnappdælinga segir aðsókn á sýninguna um húsin vera mjög góða í sumar þrátt fyrir að framkvæmdir standi yfir á lóð Norska hússins. Þar eru iðnaðarmenn nú að leggja stéttar og gera garð umhverfis húsið. Með lokum framkvæmdarinnar utanhúss verður Norska húsið og umhverfi þess komið í upprunalegt horf, en framkvæmdir hófust árið 1972 og hafa staðið yfir síðan með hléum.
Starfsfólk Norska hússins hefur fengið nýja búninga, eins og sjá má á meðfylgjandi mynd. Þeir gefa húsinu meira líf, að sögn Aldísar, en þeir voru framleiddir af Þjóðbúningastofunni og eru sem líkastir þeim sem búðarkonur notuðu á 19. öld.