Sú starfsemi í Borgarbyggð sem áður var kölluð Skólaskjól hefur nú skipt um nafn og heitir í dag Tómstundaskólinn. Þar gefst börnum í grunnskóla kostur á að dvelja eftir skóla, hvort sem þau eru að bíða eftir að komast heim með skólabíl eða að verða sótt af foreldrum sínum.  Gjaldskrá fyrir dvöl í Tómstundaskólanum hefur verið hækkuð, sem að sögn Páls S. Brynjarssonar sveitarstjóra, kemur til af því að sveitarfélagið hefur ákveðið að stórbæta þjónustuna. Verðið fyrir dvölina verður 165 krónur á klukkustund og 75 krónur fyrir hressingu, bæði í Borgarnesi og á Hvanneyri. Fyrir byggðaráðsfundi, sem verður í dag miðvikudag, liggur fyrir tillaga um að þau börn sem þurfa að bíða í Tómstundaskólanum eftir skólabíl sem fer í dreifbýlið munu borga 20% af þessu gjaldi. Páll sagði jafnfram að verið væri að vinna að samræmi á þessum málum í sveitarfélaginu öllu og athuga hvort bæri að koma upp svipaðri aðstöðu á fleiri stöðum.