Á vegum Eyrbyggju - Sögumiðstöðvar í Grundarfirði er nú unnið að stofnun Sagnamiðstöðvar Íslands. Markmið hennar er að endurvekja og kynna sagnalist sem lifandi listform. Hér er um verulega stórhuga og metnaðarfullar hugmyndir að ræða sem fróðlegt verður að sjá hvort fái verðskuldað brautargengi. Verkefni slíkrar miðstöðvar verða margs konar og miða að því að efla vitund þjóðarinnar um þann ríkulega sagnaarf sem hún á. Helstu áherslur í starfi miðstöðvarinnar verða því að standa fyrir námskeiðum í sagnalist, skipuleggja og koma upp tengslaneti íslensks sagnafólks, standa fyrir alþjóðlegri sagnahátíð og koma á íslenskum sagnadegi um allt land. Eftir er að vinna ákveðnum hugmyndum framgang varðandi uppbyggingu Sagnamiðstöðvar Íslands, segir Ingi Hans Jónsson, forstöðumaður Eyrbyggju og hugmyndasmiður verkefnisins.