Sveitarstjórn Borgarbyggðar hefur sent samgönguráðherra, Kristjáni Möller ályktun um að vegabætur á Vesturlandi verði settar í forgang í nýrri samgönguáætlun. Á síðasta fundi sveitarstjórnar Borgarbyggðar var samþykkt bókun frá forseta, Birni Bjarka Þorsteinssyni þar sem segir meðal annars: „Sveitarstjórn Borgarbyggðar beinir því til samgönguráðherra að setja vegabætur á Vesturlandi í forgang í nýrri samgönguáætlun. Um leið og gerð verði heildstæð áætlun um uppbyggingu og viðhald safn- og tengivega á svæðinu verði gerð áætlun um bætt umferðaröryggi á Vesturlandsvegi. Greiðar og öruggar samgöngur um Vesturlandsveg skipta ekki aðeins höfuðmáli fyrir þróun búsetu á Vesturlandi, heldur er hann mikilvæg samgönguæð fyrir landið allt, ekki síst eftir að strandflutningar lögðust af að mestu með tilheyrandi aukningu þungaumferðar um þjóðveginn.“