17. september. 2007 10:22
Skagamenn gerðu 2-2 jafntefli við Val í Laugardalnum í kvöld í hörkufjörugum leik. Það helliringdi á vellinum í kvöld, en fjölmargir áhorfendur létu það ekki á sig fá. Flestir voru á bandi heimamanna, enda lá mikið undir hjá þeim; með sigri hefðu þeir náð toppsætinu. Valsarar byrjuðu betur og liðið sótti nokkuð. Um miðjan fyrri hálfleik bar það árangur þegar Atli Sveinn Þórarinsson kom boltanum í netið. Páll Gísli hafði slegið fyrirgjöf út í teig, en rann síðan á hálum vellinum og komst ekki fyrir skot Atla Sveins sem hafnaði í netinu. Heimamenn voru heldur líklegri til að bæta við en gestirnir að jafna það sem eftir lifði hálfleiksins.
Valsmenn komu mjög ákveðnir til leiks í síðari hálfleik og ætluðu greinilega að láta kné fylgja kviði og tryggja sér toppsætið. Þeim tókst hins vegar ekki að skora og Skagamenn beittu sínu hættulegasta vopni, skyndisóknunum. Björn Bergmann Sigurðarson jafnaði metin úr einni slíkri með fallegu marki. Skömmu síðar kom hann Skagamönnum yfir með öðru skallamarki og innsiglaði þannig frábæran leik sinn. Mikil barátta fór í hönd og Völsurum tókst að jafna metin með marki Pálma Rafns Pálmasonar. Fleiri mörk voru ekki skoruð og úrslitin því 2-2 í bráðfjörugum leik.