Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
17. nóvember. 2007 11:23

Skallagrímur hafði heimaslaginn gegn Snæfelli

Það ríkti mikil stemning fyrir leik Vesturlandsliðanna Skallagríms og Snæfells sem fram fór í Borgarnesi í gærkvöldi. Ríflega 500 manns mættu á pallana og fylgdust með hreinum háspennuleik. Þetta var 29. viðureign liðana síðan árið 1991, skv. heimildum tölfræðinga Skallagrímsliðsins. Þá höfðu liðin unnið jafn marga leiki, eða alls 14, fyrir leikinn. Leikurinn byrjaði fremur rólega og voru heimamenn að spila góðan sóknarbolta á tíðum. Vörnin var þó eitthvað á reiki, en Hólmarar voru ekki að hitta vel. Milojica Zekovic var fremstu meðal jafningja hjá heimamönnum og setti niður góðar körfur. Einnig skoraði Pétur Már tvær mikilvægar þriggja stiga körfur. Hjá Snæfelli fór Justin Shouse mikinn sem og Sigurður Þorvaldsson. Staðað að loknum fyrsta leikhluta var 21:15 fyrir Skallagrím.

Segja má í stuttu máli að annar leikhluti hafi verið eign Hólmara. Þeir kaffærðu slaka svæðisvörn Skallagríms með hverri þriggja stiga körfunni á fætur annarri. Justin Shouse setti fjórar og Sigurður Þorvaldsson tvær. Á kafla virtist sem svo að heimamenn hefðu játað sig sigraða. Mest fór munurinn í 16 stig en undir lok leikhlutans náðu Borgnesingar örlítið að klóra í bakkann. Hálfleikstölur urðu því 37-50 fyrir Snæfelli.

Greinileg batamerki var á leik Skallagríms í þriðja leikhluta, enda hafði Webb þjáfari látið sína menn finna fyrir heitu tevatninu í hálfleik. Endurkoma heimamanna hófst fyrir alvöru um miðjan leikhluta og voru það Hafþór Ingi, Axel og Allan Fall sem drógu vagninn. Snæfell hélt þó forystunni að loknum þriðja leikhluta með fjórum stigum, eð 62:66.

 

Þegar fimm mínútur voru eftir af leiknum var staðan 70-68 fyrir heimamenn. Geof Kotila gat ekki annað gert á þeim tímapunkti en að taka leikhlé til að ná mönnum sínum inn í leikinn að nýju. Hafþór Gunnarsson lét ekki deigan síga eftir leikhléið og setti niður stóran þrist, Shouse minnti á sig með tveimur stigum fyrir Snæfell og var staðan þá orðin 73:70. Zeko fylgdi fordæmi Hafþórs og bætti við öðrum þristi og hófst þá mikil spenna hjá öllum viðstöddum; leikmönnum, þjálfurum, dómurum og ekki síst áhorfendum sem voru við það að fara á límingunum. Villurnar tóku að hrannast upp og setti Sigurður Þorvaldsson m.a. fjögur víti á stuttum kafla. Dramatíkin tók völdin á síðustu mínútum leiksins. Menn tóku þó að fjúka útaf með fimm villur og fóru þeir Hlynur Bæringsson, Axel Kárason og Hafþór Gunnarsson á tréverkið. Shouse setur tvö víti niður en Zeko skoraði í næstu sókn og kom heimamönnum í vænlega stöðu, 81:76. Strax í næstu sókn náði Justin Shouse að skora körfu góða og náði að setja vítið niður, 81:79. Boltinn var of heitur í höndum heimamanna og misstu þeir boltann til Hólmara og var brotið á Sigurði Þorvaldssyni. Fékk hann gullið tækifæri til að jafna leikinn, en misnotaði fyrra skotið.  Náði hann að setja það seinna niður og staðan því 81-80. Þetta urðu síðustu stig leiksins.

 

Bæði lið fengu tækifæri síðustu mínútu leiksins til að ganga frá honum, en allt kom fyrir ekki þrátt fyrir hetjulega tilraun Justin Shouse á síðustu sekúndunum. Mikil gleði greip um sig meðal stuðningsmanna Borgnesinga og ætlaði þakið hreinlega að rifna af húsinu. Hjá Snæfellingum stóð Justin Shouse uppúr og fór hann á kostum í sóknarleik þeirra og skoraði alls 31 stig. Ekki má þó gera lítið úr varnarleik Hlyns Bæringssonar og reif hann niður hvert frákastið á fætur öðru og endaði hann með 17 fráköst og 10 stig. Hjá Borgnesingum var það útlendingasveitin sem hélt sóknarleiknum uppi en Zeko var með 21 stig, Fall 19 og Flake 12. Einnig steig Hafþór upp á mikilvægum stundum og dreif lið sitt áfram af mikilli eljusemi. Axel Kárason var drjúgur og setti niður góðar körfur ásamt því að taka mikilvæg fráköst. Pálmi og Pétur skiluðu sínu að vanda og var Pálmi eins og klettur í hafi þegar Justin Shouse brotlenti á honum í lok leiksins.

 

Byggt á lýsingu www.skallagrimur.org.

Ljósm. Svanur Steinarsson.

Sjónvarp Skessuhorns
Leit á vefnum
Fréttasafn
Næsta ár Fyrra ár
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is