Senda Skessuhorni fréttaskot
Spurning vikunnar
Hver er þinn uppáhalds mánuður
Áskrift að Skessuhorni
Færð á vegum
Vestfirðir Suð-Austurland Vesturland Austurland Norðurland Suð-Vesturland Landið allt Suðurland
30. nóvember. 2007 03:54

Spölur ýtir við samgönguráðherra um aðgerðir

Stjórn, framkvæmdastjóri og aðstoðar framkv.stj. Spalar
Stjórn Spalar ehf. hefur kynnt Kristjáni L. Möller samgönguráðherra þrjá kosti sem félagið og ríkisvaldið standa frammi fyrir varðandi málefni Spalar og Hvalfjarðarganga vegna uppgreiðslu skulda, gjaldskrár ganganna, hugsanlegrar komu Spalar að tvöföldun ganganna og vegna þess verkefnis ríkisins að tvöfalda veginn á Kjalarnesi. Stjórn Spalar tekur afstöðu málsins á næstunni og það þurfa stjórnvöld sömuleiðis að gera. Þetta kom fram á aðalfundi Spalar á Akranesi í gær.

Eins og fram kom í Skessuhorni í upphafi árs undirrituðu Spölur og Vegagerðin samkomulag í janúar sl. um að Spölur hraðaði um tíu ár uppgjöri á 150 milljóna króna skuld við Vegagerðina og að þessum fjármunum yrði varið til undirbúnings framkvæmda við að tvöfalda þjóðveginn um Kjalarnes og gera ný göng undir Hvalfjörð. Vegagerðin leggur 100 milljónir króna til viðbótar í þessa undirbúningsvinnu á þessu ári og því næsta. Samkomulagið var gert í ljósi þess að mjög aukin umferð kallaði á að hyggja að auknum afköstum umferðarmannvirkja á Kjalarnesi og undir Hvalfirði.

 

Fram kom á aðalfundi Spalar í gær að undirbúningsvinna væri í fullum gangi og ætla mætti að frumrannsóknum og fleiri þáttum yrði lokið í mars 2008. Þá myndi jafnframt liggja fyrir kostnaðaráætlun verkefnisins. Fjögurra manna starfshópur stjórnar undirbúningnum. Í honum sitja Gísli Gíslason stjórnarformaður og Gylfi Þórðarson framkvæmdastjóri af hálfu Spalar en Hreinn Haraldsson og Jónas Snæbjörnsson af hálfu Vegagerðarinnar. Helstu verkefnin eru til dæmis að ganga frá veglínum og skipulagi á Kjalarnesi, hyggja að nauðsynlegum landakaupum, fjalla um umhverfisáhrif og meta kostnað.

Gísli Gíslason greindi frá því í skýrslu stjórnar Spalar að hann hefði ásamt Gylfa Þórðarsyni átt fund með Kristjáni L. Möller samgönguráðherra til að greina honum frá þeim kostum sem stjórn Spalar og stjórnvöld stæðu nú frammi fyrir og taka þyrfti afstöðu til fljótlega:

Að gjaldskrá Spalar verði haldið óbreyttri næstu árin. Þannig verði að óbreyttu unnt að ljúka við að greiða skuldir félagsins árið 2015 og afhenda ríkinu Hvalfjarðargöng skuldlaus, þremur árum fyrr en gert er ráð fyrir í samningum.

Að halda innheimta veggjald í Hvalfjarðargöngum út samningstímann, þ.e. til 2018, en lækka gjaldið enn frekar innan tveggja til þriggja ára.

Að halda óbreyttu veggjaldi til ársins 2018 og nota umframtekjur af umferðinni til að fjármagna að hluta tvöföldun Hvalfjarðarganga og flýta jafnframt fyrir framkvæmdinni.

 

Gísli ítrekaði í máli sínu að fyrr en síðar yrði að marka stefnu í málinu og bætti síðan við orðrétt: ,,Augljóst er að ef ekki er áhugi eða sátt um að safna fjármunum til að hefja framkvæmdir við tvöföldun Hvalfjarðarganga nær það mál ekki lengra og mun Spölur þá ekki huga frekar að undirbúningi þeirrar framkvæmdar. Stefna félagsins yrði þá sú að halda óbreyttu gjaldi og flýta uppgreiðslu lána. Ef óskir eru um það af hálfu ríkisins að lækka veggjaldið og halda innheimtu þess áfram til ársins 2018 myndi stjórn Spalar taka þann þátt til sérstakrar skoðunar."

 

Gísli sagði að Samtök sveitarfélaga á Vesturlandi deildu þeirri skoðun Spalar að nauðsynlegt væri að hraða undirbúningi framkvæmda við vegabætur á Kjalarnesi og undir Hvalfirði, auk þess sem sem lagning Sundabrautar væri ,,gríðarlegt hagsmunamál höfuðborgar og landsbyggðar."

 

Stjórnarformaðurinn sagði síðan: ,,Hætt er við að jákvæð áhrif Hvalfjarðarganga muni dvína ef umferð verður það mikil um göngin að þau anna ekki umferðinni. Því er það mikið hagsmunamál íbúa og vegfarenda að tryggt verði að tvöföld Hvalfjarðargöng og vegur á Kjalarnesi verði að veruleika í náinni framtíð. Það skiptir ef til vill ekki meginmáli hvort slík framkvæmd verður með eða án aðkomu Spalar ehf. en ljóst er að komi Spölur ekki að málinu þarf að bragði fjármuni úr ríkissjóði á vegaáætlun til að koma verkefninu í framkvæmd."

Sjónvarp Skessuhorns
Leit á vefnum
Fréttasafn
Næsta ár Fyrra ár
Mest lesið í vikunni
Aðsendar greinar
Hulda Hrönn Sigurðardóttir

Þjónusta við einstaklinga með ...

Ásmundur Einar Daðason

Ljósleiðari á hvert heimili

Bjarni Jónsson

Landsnet verði í samfélagseigu

Ólafur Óskarsson

Betri byggð, öruggari umferð

Lilja Rafney Magnúsdóttir

Spilavíti eru „Víti til varnað...

Frá mbl.is

Ekki tókst að sækja efni

Frá visir.is

Ekki tókst að sækja efni

Skessuhorn á Facebook Skessuhorn á LinkedIn Skessuhorn á Twitter Skessuhorn á Instagram Skessuhorn ehf. kt. 560103-3870 - Kirkjubraut 56, 300 Akranes - Sími 433 5500 - Ritstjórn skessuhorn@skessuhorn.is