Glóð úr vindilsstubbi varð til þess að eldur kviknaði í gróðri við gönguleið upp að fossinum Glymi í Botnsdal síðdegis í gær. Slökkvilið Akraness og Hvalfjarðarsveitar var kallað út rétt fyrir klukkan fimm og fóru tíu slökkviliðsmenn á staðinn. Þeir þurftu að ganga með allan búnað nokkurra kílómetra leið upp bratta hlíðina en þar logaði í mosa og öðrum gróðri. Þráinn Ólafsson slökkviliðsstjóri segir að eina sem dugað hafi á eldinn hafi verið skóflur og klöppur. „Það gekk nokkuð vel að slökkva þrátt fyrir erfiðar aðstæður. Gróður er mjög þurr núna og full ástæða til að hvetja fólk til að fara varlega með eld og henda ekki frá sér logandi sígarettu- eða vindlastubbum. Strákarnir fundu þarna vindilsstubb sem örugglega er ástæðan fyrir eldinum,” sagði Þráinn.