30. júní. 2008 01:03
Endurbætur á húsnæði fyrrum Húsmæðraskólans á Varmalandi halda áfram í sumar, en stöðugt meiri hluti starfsemi grunnskólans á Varmalandi er að færast í húsið. Að sögn Ásthildar Magnúsdóttur, fræðslustjóra Borgarbyggðar var börnum í 7. – 10. bekk skólans kennt þar sl. vetur, en stefnt er að því að öllu mið- og elsta stigi skólans verði kennt í “Húsó” eftir að endurbótum við húsið lýkur. Í sumar verður haldið áfram með endurbætur innandyra þannig að það þjóni betur þörfum grunnskólans. “Íbúðum í austurenda hússins verður breytt í starfsmannaaðstöðu og stofum á miðhæð breytt með svipuðu sniði og gert var á efstu hæð hússins á sl. ári. Þessum breytingum á að verða lokið á þessu ári og þá verður hægt að flytja bæði skólastigin í húsið,” sagði Ásthildur.
Hún bætir því við að áætlað sé að gera nýtt anddyri í húsið. Sjálf kvaðst Ásthildur vera mjög ánægð með hvernig gamla húsmæðraskólahúsið sé að verða. “Þetta er gott hús á fallegum stað og þar er að verða til fyrirtaksaðstaða til kennslu.
Ásthildur segist gera ráð fyrir því að á árinu 2009 eða 2010 verði ráðist í endurbætur á grunnskólahúsinu sjálfu. Þar verður í framtíðinni yngsta stigi grunnskólabarna kennt og leikskólinn færður þangað í rúmbetra húsnæði. Þá verða verkgreinar kenndar þar áfram og mötuneytið verður einnig starfrækt á sama stað.